Shillong, Lber 16 : U Chief Election Officer (CEO) ka Jylla BDR Tiwari, ula pyntip ba ka Model Code of Conduct (MCC) kala treikam mynta hapoh ka Jylla bad ka Tnad Election kan pyntreikam pyrrkhing bha ia ka MCC ban wanrah ia ka elekshon Lok Sabha 2024 kaba khuid bad bym shah liang.
Ka Election Commission ka Ri India hynne ka sngi Saitjain, kala pynbna ba ka jingthep vote ha Shillong bad Tura kan long ha ka 19 tari Iaiong bad ka sngi niew ia ki vote kan long ha ka 4 tarik Jylliew.
Lah ban kdew hangne b aka samoi treikam jong ka 17th Lok Sabha kan kut ha ka 16 tarik u Jylliew.
U Tiwary ula pyntip ba ka sngi pynmih ia ka gazette notification kan long ha ka 20 tarik Lber katba ka sngi ba khatduh ban thep kyrteng ki kyrtong kan long ha ka 27 tarik Lber.
Ka jingbishar kyrteng ia ki kyrtong kan long ha ka 28 tarik Lber bad ka sngi khatduh ban weng kyrteng kan long ha ka 30 tarik Lber.
Haba pyntip ba yn pyntreikam pyrrkhing bha ia ka MCC ha Jylla, u CEO ula ong “Ngin sa shim ia ki sienjam kiba donkam ban pynthikna ba kan yn don ka jingpynkhein ia ka MCC. Yn ym lah shuh ban pyntrei ia ki kam thymmai bad kumjuh ruh ia ki skhim thymmai. Lada don ki kam kiba la iaid, kine ki lah ban bteng”.
Ula pyntip ruh ba ki jingthoh bad jingtah poster ha ki nongkynti ruh yn sa weng noh hapoh ka 24 kynta bad 48 kynta hadien bala pynbna ia ka elekshon.
U CEO ula pyntip ba ka Tnad Election kala shim ia baroh ki sienjam kiba donkam ban pynthikna ia ka jingpynlong ia ka elekshon kaba khuid, ka bym shah liang, kaba ioh iashimbynta lut, kaba shai bad kaba suk ba sain.
Ula pyntip ba yn sa pynkhlain bha ia ka bor pahara ha Jylla ban pynthikna ia ka jinglong jingman kaba suk ba sain bad bynrap ba ka Jylla kala dep ithuh ia ki Polling Station kiba ikop mih jingkulmar bad kiba don jingma bad kala shim ruh ia ki sienjam kiba donkam ban shim.
Haba kylli, u Tiwari ula iathuh ba ka ECI kala ai ka jingbthah ia ki Central Agency ban pynkhlain ia ka jingpahara ha khappud lyngba ki BSF bad kiwei kiwei ki bor shipai. “Ki BSF bad kiwei kiwei ki shipai kila leh ia kaba donkam bad kila shim iaki sienjam kat kum ka jingbthah ka ECI” ula bynrap.
Nalor kane, u CEP ula ong ba ka Jylla kala shim ruh ia ki sienjam ba donkam ban pynkiew ia ka jingwan thep vote jong ki paidbah ha kane ka elekshon Lok Sabha ban wan.
U CEO ula iathuh ba ka jingdon ki nongthep vote ha Meghalaya ha kane ka elekshon Lok Sabha ka long 22,17,100 ngut ha kaba 10,94,947 ki dei ki shynrang, 11,22,150 ngut ki kynthei bad 3 ngut kiba khleh kynthei shynrang.
U iathuh ba ka jingdon ki nongthep vote kala kiew da 55971 ngut ha kane ka shisnem kata naduh u 2023-2024.
Ki don haduh 3835 ki nongthep vote kiba dei ki service voters, 11,179 ki briew ba duna dkhot met, 23,793 ngut kiba la 80 tam, 10,345 kiba la palat 85 snem , 5 ngut ki NRI kat kum ka final electoral roll bala pynmih ha ka 5 tarik Kyllalyngkot 2024.
Ka Jylla ka don haduh 3512 tylli ki Polling Station ha kaba 326 tylli ki don ha jaka sor bad 3186 ha Nongkyndong.
 ka Jylla BDR Tiwari, ula pyntip ba ka Model Code of Conduct (MCC) kala treikam mynta hapoh ka Jylla bad ka Tnad Election kan pyntreikam pyrrkhing bha ia ka MCC ban wanrah ia ka elekshon Lok Sabha 2024 kaba khuid bad bym shah liang.){kind=link}