Shillong, Iaiong 18 : Ka jingialap elekshon kaba thnem bha jong ka Elekshon Lok Sabha ha Shillong bad Tura Parliamentary seat, kala kut noh hynnin ka sngi Balang por 4 baje janmiet bad mynta ki 10 ngut ki kyrtong kila ap satang ia ka rai jong ki paidbah, ki ban thep ia ka vote lashai ka sngi Thohdieng ka 19 tarik Iaiong.
Haduh 22,17,100 ngut ki nongthep vote ka Jylla kin mih ban pyndep iala ka kamram ban jied nongmihkhmat lashai ka sngi ha baroh artylli ki constituency ka Jylla.
Kine ki kynthup ia 10,94,947 ngut ki shynrang bad 11,22,150 ki kynthei lem bad 3 ngut ki bahkong.
Hynriew ngut ki kyrtong ki iakhun na Shillong Parliamentary seat bad kine ki dei u MP ka Congress Bah Vincent H Pala, kyrtong ka NPP Kong Ampareen Lyngdoh, kyrtong ka RDA Robertjune Kharjahrin, kyrtong ka VPP Dr Ricky AJ Syngkon bad ki kyrtong shimet Prof Lakhon Kma bad Peter Challam.
Ha Tura kiba iakhun ki long saw ngut bad kine ki dei ka MP bad kyrtong ka NPP Agatha K Sangma, u kyrtong ka TMC Zenith Sangma, kyrtong ka Congress Saleng Sangma bad kyrtong shimet Laben Marak.
Ka Jylla ka don haduh 3512 tylli ki Polling Station ba kynthup ia 2288 tylli jong ka Shillong parliamentary seat bad 1224 tylli jong ka Tura parliamentary seat. Napdeng kine, 326 tylli ki don ha jaka sor bad 3186 ha Nongkyndong.
U Chief Election Officer (CEO) Dr BDR Tiwari ula ong ba ka kynta ba jar jar kala treikam bad baroh ki seng sain pyrthei kim lah shuh ban pynlong ia ki jingialang ialap elekshon lait noh na ka jingleit rung thliew iing ban iakynduh briew.
“Ka jingleit ialap para marwei bad jingiakren iakhana kan don hynrei ym ka jingialap da ki seng sain pyrthei ha kine ki kynta” ula ong.
