Shillong, Iaiong 08: Ki paid nongthep vote ka thain Tarabari sector, kila rai ban wan thep vote sha Meghalaya ha ka elekshon Lok Sabha ban long la 19 tarik ym ban leit sha Assam.
Ki paidbah ka Tarabari Sector kila shim ia kane ka rai haka jingialang bala wan iashimbynta da ki paidbah na ki 5 tylli ki shnong ka thain ba kynthup ka Garopara, Balkham, Damrang, Dokholgre bad ka shnong Bhalukmari.
Lah ban kdew hangne, ka Tarabari Sector ka dei kaba don ha ka jingiakajia khappud hapdeng ka Meghalaya bad Assam. Ia kane ka jaka la dep ban iakren pynbeit ha ka Phase-I bad kat kum ka soskular bala iasoi hapdeng ka Sorkar Meghalaya bad Assam, kane ka thain kala leit noh sha Jylla Assam.
Haba pynbna ia kane ka rai, u president ka Tarabari Sector Gupta Sangma ula ong ba ki nongshongshnong jong ki 5 shnong kila shah kyntait haka Meghalaya haka jingiapynbeit pud jong ka Phase I hynrei ki nongshongshnong kila rai ba kim kwah satia ban don bad ka Assam.
“Mynta ngi la rai ban nym thep Vote shuh hapoh Assam hynrei ngi kwah ban thep Vote ha Meghalaya namar baroh ngi kwah ban don ha Meghalaya hynrei haduh mynta ngim pat ioh iaki EPIC na Meghalaya” ong u Gupta.
U Gupta ula pyntip ba hashuwa ka jingiasoi MoU ban pynbeit pud hapdeng ka Meghalaya bad Assam, ki Regional Committee jong baroh artylli ki Jylla kila buh ka jingkylli, la ki 5 shnong ki kwah ban don ha Meghalaya ne Assam.
Ula pyntip ba ki 5 tylli ki shnong kila rah kti ban pynpaw ba ki kwah ban don ha Meghalaya hynrei naka liang baroh artylli ki Sorkar Jylla ki khlem burom satia iaka rai jong ki paidbah.
Halor kane u President ka Tarabari Sector ula kyntu iaka tnat ilekshon ka Sorkar Meghalaya ba kan shim khia ban pynioh EPIC iaki nong shong shnong ban ioh thep Vote haka 19 tarik mynta u bnai.
Lah ban kdew baka jingthep Vote ha Meghalaya kan long tang shisien kata haka 19 tarik Iaiong hynrei hapoh Assam ka jingthep Vote kan long haka 19 tarik, 27 tarik Iaiong bad 7 tarik Jymmang 2024.
