Shillong, Iaiong 10 : Ka Liang Pyrshah Voice of the People Party (VPP) kala ngat ha ka show cause notice ha ka Tnad Election namar ka jingkynnoh leit pynthut ki nongkyrshan ia ka jingialang ialap elekshon jong ka seng National People’s Party (NPP).
U Returning Officer (RO) ka Shillong Parliamentary constituency, ula phah ia ka show cause notice sha u President ka VPP Bah Ardent M Basaiawmoit ba pan jingshai ha lane hashuwa ka 12 tarik Iaiong ba balei ba ym dei ban leh eiei pyrshah ia u kat kum ki kyndon jong ka Model Code of Conduct (MCC).
Kat kum kane ka show cause, u Returning Officer u pyntip ba ula ioh pdiang ia ka jingujor ha ka 9 tarik Iaiong ba ki Nong kyrshan ka VPP kila leit ban hylla slogan bad pynthut ia ka jingialang ialap elekshon jong ka NPP ba long ha ka 8 tarik Iaiong ha Jaiaw, kaba la pynlong ia ka NPP ban pynsangeh noh ia ka jingialang shuwa ka por.
Haba pyntip ba ka ECI kala pyntreikam ia ka Model Code of Conduct (MCC) jong ka elekshon Lok Sabha naduh ka 16 tarik Lber, 2024, u RO ula ong ba MCC kala buh kyndon ia ki seng sain pyrthei bad ki kyrtong ba ong “Ki seng sain pyrthei bad ki kyrtong ki dei ban pynthikna ba ki nongkyrshan jong ki, kim dei ban pynthut ha lane pynthut ia ki jingialang ne ki jingiaid procession jong kiwei pat ki seng sain pyrthei”.
“Ki nongtrei ne nongiarap (sympathizers) jong kawei ka seng sain pyrthei, kim dei ban pynmih jingkulmar ne pynthut ia ki jingialang ialap elekshon bala pynlong da kiwei pat ki seng sain pyrthei da kaba buh jingkylli ia ki kyrtong lane ai da ka jingthoh lane sam kot lyngkdop jong ka seng sain pyrthei lajong. Ym dei ruh ban pynlong ia ka jingiaid procession da kawei ka seng sain pyrthei ha ki jaka ba long jingialang jong kiwei pat ki seng sain pyrthei. Ym dei ban weng ia ki poster bala tah da kiwei ki seng sain pyrthei da ki nongtrei jong kawei pat ka seng sain pyrthei”.
U RO ula ong “Kumta, haba ailad ia phi ban ioh ia ka jingbishar, la bthah ia phi ban jubab ia ka show cause ha lane hashuwa ka 12 tarik Iaiong ba balei ba ym dei ban leh eiei pyrshah ia phi (Ardent M Basaiawmoit) hapoh ki kyndon jong ka Model Code of Conduct”.
