Shillong,Risaw 19 : Ka lyer elekshon MP-Lok Sabha 2024 kala sdang beh mynta hapoh ka Jylla kaba lah ruh ban sakhi ia ki jingiabujli uniform jong ki Nongialam sain pyrthei.
Ka khubor hamsaia kala mih mynta ba u Vice President ka All India Trinamool Congress (AITC) bad MLA barim ka Umroi Bah George B Lyngdoh, ula don jingthmu ban leit iasoh noh sha ka National People’s Party (NPP) kaba synshar mynta ia ka Jylla,ha kine ki khyndiat sngi ban wan.
Ym tang u Bah George, kila don ruh ki kyrtong ba thmu mih aireng ha kane ka elekshon ka ban sa long hadien 6-7 bnai, kiba la iakren mynta bad ki seng sain pyrthei bapher bapher, ban pan ticket bad ban leit iasoh.
Ka khubor ka iathuh ba une u MLA ka Umroi u lah ban ioh ia ka ticket jong ka NPP ban aireng na Shillong Parliamentary seat ha ka elekshon Lok Sabha 2024 ban iakhun pyrshah ia u MP ba mynta bad President ka MPCC Bah Vincent H Pala.
Watla ka AITC bad ka NPP kim pat pynpaw satia ia u kyrtong ba kin sei ha kane ka elekshon hynrei ka khubor ba iajan bad ka NPP ka pyntip ba ki Nongialam ka NPP kila iakren na ka por sha ka por bad une u MLA barim ka Umroi.
Ka khubor ka iathuh ruh ba u Bah George u lah ban pynbna shen ia ka jingiehnohkam na ka AITC ka ban plie lynti ia ka jingleit iasoh sha ka NPP.
Namar ka khubor hamsaia kala pur, ka AITC haba iohi ia ka dak ka jingma, kala aiksai ruh ba u Bah George Lyngdoh u dei uba biang eh ban iakhun ia ka elekshon Lok Sabha ban wan.
U President ka AITC Meghalaya bad MLA ka Nongthymmai Bah Charles Pyngrope, u la pynpaw ia ka jingai jingkyrshan ia u Vice President ka party Bah George B Lyngdoh kum u kyrtong ban iakhun na Shillong Lok Sabha seat.
Lada kane ka khubor hamsaia ka dei kaba shisha, ka NPP mynta kan don hapdeng ka jingeh ban jied ia u kyrtong hapdeng ki arngut ki MLA barim kata hapdeng u Bah Himalaya M Shangpliang uba la wan pyniasoh shen bad u Bah George B Lyngdoh.
Ka MP ka Tura Agatha Sangma kan mih aireng biang ban pynneh ia ka jinglong Nongmihkhmat sha Lok Sabha na Tura Constituency ha kane ka elekshon ban wan.
