Shillong, Nohprah 08: U National General Secretary ka National People’s Party (NPP) James PK Sangma, hynne ka sngi Thohdieng ula ong ba ka seng NPP kala jam shakhmat ban ia kiwei pat ki seng sain pyrthei ha kaba iadei bad ka jingpynkhreh iaka elekshon MP Lok Sabha ka ban long ha u snem ban wan.
Haba iakren bad ki nongthoh khubor, u James Sangma ula ong, ha ka rilum Garo, ka MP ka Tura kaba mynta ka Agatha K Sangma kala iaid shakhmat ha ka jingialap elekshon watla kam pat don ka jingshongshit hynrei ka jingialap elekshon bad ka jinglum ia ki jingialang kala iaid bha shakhmat.
“Ia mynta hi, kala nang jam shaphrang ha kaba iadei ba ka jingialap elekshon bad ka jinglah ban poi ha kylleng ki jaka bad ka jingshisha ka long ruh ba ka MP jong ngi kala lehbha hapoh ka Parliament bad kala leit sha kylleng ki jaka bad shimkhia ia kiba bun ki mat ym tang iaka rilum Garo hynrei iaka jylla hi baroh kawei” ong u James.
Ula pyntip ruh ba ka MP ka Tura, dang shen, kala leit ialam ia ka kynhun kaba kynthup ia ki nongialam na Garo Hills sha Delhi ban iakynduh ia u Myntri Kam Pohiing ka ri, ha kaba kila kyrpad ban shimkhia ban pynbeit ia ka mat kaba iadei bad ka jingbym pynrung ia ka ktien Garo ha ka Eighth Schedule jong ka riti synshar ka ri.
Ula pynpaw iaka jingskhem jingmut ba ka Agatha kan jop biang iaka elekshon MP Lok Sabha na Tura.
“Ha kaba iadei bad ka rukom treikam ka jong ka, kala leh bha bad ngam iohi ban don kano kano ka jingktah ia ka ha ka por elekshon” ula ong.
Ha kaba iadei bad ka jingkynnoh u President ka BJP ia ka jingbym hun ia ka rukom treikam jong ka Agatha bad ka kynnoh ba kala pulom ban pynthikna ba ki skhim ka sorkar pdeng kin poi sha u paidbah ka rilum Garo, na ka liang u National General Secretary ka NPP ula ong, “Ngam tip u nongialam uba kumno na ka seng BJP uba la ong kumtei, hynrei nga tharai imat ym shim la ioh bha ia ki jingtip kiba thikna, ha kaba iadei bad ka jingpyntreikam ia bun tylli ki skhim jong ka sorkar pdeng hapoh rilum Garo.Ka long kaba suk ban kynthoh ia ki briew hynrei nga ngeit ba kano kano ka jingkynthoh dei ban pynshong nongrim katkum ka jingshisha. Kaba sngewsih ka long ba ym shim la wad bniah bha, hashwa ba yn ai ia katei ka jingkynthoh namar nga ngeit ba kam shym la don kano kano ka jingsahkut ne ka jingsuki ha kaban pyntreikam ia ki skhim ka sorkar pdeng”.
Ha kaba iadei bad ka Inner Line Permit (ILP), u James Sangma ula ong, ba kane ka mat kam shym la sawa jam ha ka lynti kaba jur bha hapoh ka rilum Garo.
“Baroh ngi tip shaphang ka mat ILP, ha kaba la mynjur da ka Resolution hapoh ka iing dorbar thawain bad kane ka mat mynta ka dan gsahteng bad ka sorkar India, ka Ministry of Home Affairs ia kaba ngi hap ban long kiba iai shah bad ban ap ia ka jngpyndep ia baroh ki kam ki jam” ula ong.
Ha kaba iadei bad ka jingkynnoh ba baroh ki kam pynroi kila leit lut sha ka rilum Garo, une u nongialam ka NPP ula ong,ba katei ka jingkynnoh ka long ka bym don nongrim bad ka bym iahap satia bad kano kano ka jingkynnoh kadei ban don ia ka jingshisha.
“Nga lah ban iathuh ia phi da ka jingskhem jingmut ba katei ka jingkynnoh kam long satia kaba shisha. Lada phi peit ia ki kam pynroi kila jia ha baroh kylleng ki bynta jong ka jylla ha kaba la bhah lang bad nga tharai ba ka jingtrei ia ki kam kala iaid bha shakhmat ia kaba ngim don ia kano kano ka jingartatien” ong u James.
“Mynta ngi iohi bun ki kam pynroi kiba la jia hapoh rilum Garo hynrei haba peit ha ki por kiba mynshwa, ka rilum Garo kala shah kyntait bha hynrei haba iohi kynsan ia ki kam pynroi kiba la iaid sted bha ha rilum Garo, hynrei ki paidbah kila mutdur ba kala don ka jingleh shilliang ne noh shilliang hynrei kane kam long kaba shisha.Nga ngeit skhem ba mynta ki kam pynroi kila jia ha kata ka lynti da kaba bhah lang ia baroh” ula bynrap.
Pule lang ia kane: Pynlong ka PNGRB da ka ‘Road Show’ ha Shillong ban kynjoh 100% ka CGD
Peit lang ia kane
