Elekshon Lok Sabha: Kyrpad u Bah Sanbor ia ki paid Khasi-Jaintia ban ailad shisien iaka BJP

Shillong, Rymphang 29: U MLA ka BJP na South Shillong u Bah Sanbor Shullai hynne ka sngi Palei, ula ong ba kan long kaba lehnohei ia ki paid na ka rilum Khasi bad Jaintia ban phah ia ki kyrtong na kiwei pat ki seng saiñ pyrthei kum ki Member of Parliament (MP) na Shillong Constituency namar ba ka BJP kan dang wan biang ha ka bor ban synshar iaka Sorkar Pdeng.

U Bah Sanbor ula o, ka por kala dei ia ki paid nongthep vote ka rilum Khasi bad Jaintia ban ailad ia ka BJP na ka bynta 5 snem.

U Bah Sanbor ula kynnoh ba u MP ka Congress u Bah Vincent Pala ula pynlutkai ia ka por da kaba bam sohot hapoh Parliament namar ym shim la wanrah satia I ki kam pynroi hapoh ka jylla.

Haba iakren bad ki nongthoh khubor u Bah Sanbor ula ong, “Ka long ka bym don jingmut ban phah da ki briew kiba na kiwei pat ki seng saiñ pyrthei kum ki MP. Ki paidbha ha ka ri India ki tip bad wat ki paidbah ka Meghalaya ruh ki tip ba khlem kano kano ka jingartatien ba mynta ka kynti ruh ia ka sorkar pdeng yn thaw da ka BJP hapoh ka jingialam u Narendra Modi. Ha ka elekshon kaba la dep ka BJP kala jop 333 seat bad mynta kan dang jop bun shuh shuh”.

Ula ong ba ki paidbha kin jied biang ia ka BJP namar ba kala leh ia ki kam kiba bha ha kaba iadei bad ka roi ka par, ki skhim kiba kyntiew ia ka rukom im jong kiba duk khamtam eh ha ki thaiñ nongkyndong bad ka Sorkaru Modi kala thaw ia ki skhim ki bapher bapher na ka bynta ki nongrep bad kiwei kiwei.

“Dei na kane ka daw, nga kyntu ia ki nongthep vote jongka rilum Khasi bad Jaintia ban ym pynlut kai ia ka por, wat nym phah ia kiwei pat ki kyrtong, lem kumta ngin sa babe biang sa 5 snem” ong u MLA ka BJP.

“Lada phi jied MP na ka seng BJP na Shillong Constituency, u ne ka kin ioh long Myntri Sorkar bad kin ioh khmih ia ki tnad kiba kongsan ha kaba yn iohpdiang ruh ia kiba bun jait ki skhim bad yn ioh ruh ia kiba bun ki skhim kiban lah ban aikam aijam ia ki samla bad ia kito kiba wad kam wad jam kiba na rilum Jaintia bad Khasi” ong u Bah Sanbor.

U Bah Sanbor ula ong, ba ka seng Congress kala nang ngam katba nang mih ki sngi bad kiba bun ki nongialam ki jongka kila wan ban pyniasoh noh bad ka seng BJP bad dang shen u Myntri Rangbah barim ka Maharashtra bad ka kynhun ka jongu kila wan pyniasoh noh bad ka BJP bad wat u Working President ka Congress na Assam ruh ula wan ban pyniasoh noh bad ka BJP.

Ula ong bun kila wan pyniasoh bad ka BJP namar na ki kam kiba bha bad ki kam pynroi kiba la wanrah da u Myntri Rangbahduh ka ri u Narendra Modi.

Ha kaba iadei bad ka jingkynnoh ka seng Congress ba ka BJP kala pyndonkam bakla ia ka Enforcement Directorate (ED) u Bah Sanbor ula ong, “Ha ka elekshon, ka kamram jong ka liang pyrshah ka long ban kynthoh. Kiei kiei ki kam kiba bha kiba la leh da u Modi ka Congress ka shu kynthoh beit. Ha kaba iadei bad ka ED bad kiwei kiwei, kadei ka kamram jong ka sorkar pdeng ban leh ia kaba donkam haba don kino kino ki jingujor haba don ka jingbamsap kaba jur. Nga sngew ba kane kadei ka lynti kaba bha ba ka ED kala leh ban pynduna bad ban lap ia kano kano ka sorkar ne riewshimet, MLA, MP na ka kam bamsap”.