Shillong, Rymphang 28 : Katba ki sngi ki nang jan sha ka elekshon Lok Sabha, ka Meghalaya Pradesh Congress Committee (MPCC) ha ka sngi Balang, kala kyntu ia ki paidbah ka Jylla ba kin puson bha bad ban nym ngop ha ki jingpynbiej ieid ri shaba palat pud jong ka BJP.
Haba kren sha ki nongthoh khubor ha Congress Bhavan, Shillong, u Media Coordinator ka AICC ba khmih ia thain Shatei Lam Mihngi Matthew Anthony ula ong ba kila ioh shibun ki jingleh bym hok jong ka Sorkar ba mynta ha Delhi. Ula ong b aka don ka jingleh bym hok ha ka ioh ka kot, ka imlang sahlang, ka sain hima sima naduh ba kane ka Sorkar kala shimti ha u snem 2014.
Haba kubur ba ka Congress Party kala leh bakla ha ki snem bala leit noh, u Anthony ula ban jur pat ba ha ka jinglong briew hi ym lah lait ia ki jingbakla, hynrei kim ju len ia kata. “Ngi la pyrshang ban pynbeit ia ki jingbakla. Ngi la pyrshang ban synshar ia kane ka Ri da kaba buh hakhmat eh ia u paidbah ha ka jingmut jingpyrkhat. Ngi don ka jingngeit skhem ba ki dei ki paidbah kiban sa jied biang ia ngi mynta” ong u Anthony.
Ula bynrap ba 10 snem ka jingsynshar bym hok, ka dei ia kaban pynkut noh bad ka Congress ka dei ka lynti ia kata.
Haba phai sha ka jingbym iohkam iohjam ha India, u Anthony ula ong “44% ki briew kiba hapdeng 20 bad 22 snem ki dei kibym pat don kam. 33% ki Graduate, Postgraduate, PhD kim donkam. Ha u 2012, ka Sorkar Congress kala aikam haduh 75 lak ngut manla u snem.
Hynrei ha u 2022 ka Sorkar BJP kam pat kot wat tang 29 lak shisnem. Ngi iakren ia ki jingkhein kiba ngi ioh”.
Nalor kane, ula buh dak jingkylli ruh ba haduh katno ka BJP kan dang lah ban shukor ia u paidbah?. “Sa katno phin dang shukor ia ki paidbah halor ka niam bad kiwei kiwei ki bynta?. Sa katno phin dang leh bym patiaw ia ki jingshisha baroh” buh jingkylli une u heh AICC.
