Shillong, K’lyngkot 23 : U kyrtong monlang ka Regional Democratic Alliance (RDA) Robertjune Kharjahrin, ula kynnoh ba u MP ka Congress ba mynta ka Shillong Bah Vincent H Pala, ula ieng pyrshah ban pyntreikam ia ka Inner Line Permit (ILP) hapoh Meghalaya.
Haba iakren bad ki nongthoh khubor hynne ka sngi Ba-ar, u Bah Kharjahrin ula ong ba dei kane ka daw ba ka Meghalaya kam pat shym la ioh ia ka ILP lehse ba u iai pyrshah une u MP. “Phi lah iohi ia u Bah Vincent Pala uba kren na ka por sha ka por pyrshah ia ka jingpyntreikam ka ILP hapoh ka Jylla” ula ong.
Ula phah ia ka khubor sha baroh ki paidbah ka Jylla, haba ban jur ba lada ki kwah ban iohi ia ka jingpyntreikam ia ka Inner Line Permit (ILP), ki dei ban vote ia u kyrtong u ban iaid shispah na ka shipah ba pynioh ia ka ILP.
Ka Regional Democratic Alliance (RDA) ka dei ka kynhun synrop jong ki seng riewlum ba kynthup ia ka United Democratic Party (UDP) bad ka Hill State People Democratic Party (HSPDP).
Ka RDA kala ot ribbon hynne ka sngi Ba-ar ia ka jingsdang jong ka jingialap elekshon ha Shillong Parliamentary seat.
U Bah Ribertjune uba dei u President barim ka HYC, ula iathuh ia ki mat ialap elekshon jong u ba kynthup ia ka jingdawa pyntreikam ia ka ILP, ban pynrung ia ka ktien Khasi ha ka khyrnit ba phra, ban kren halor ka jingshah pyndik ki paid Khasi ha Bangladesh bad ban pynbeit noh ia ki jingiakajia pud bad ka Assam.
Nalor kane, ula kren ruh halor ka jingdonkam ban wanrah noh la ka jong ka Indian Civil Service jong ka Meghalaya.
