Pan kaiphod na ki DEO ba pyndonkam ia ki Khynnah skul haki jingialang
Shillong Iaiong 16: Ka Tnad Election ka jylla kala long kaba la pynkhreh ban pynlong ia ka elekshon MP Lok Sabha 2024 ha ki ar tylli ki Parliamentary Constituency ha Shillong bad Tura, ba kan long kaba iaid beit iaid ryntih bad kaba khuid kaba suba.
Watla ka jingthep vote ha u snem 2019 ka long 71.42 percent, mynta u snem ka tnad Election ka khmih lynti ba kan don ka jingkiew ha ka jingleit thep vote ki paidbah da kaba phai sha ka rukom mih ki paidbah ha ki jingialang ialap elekshon.
Ka Tnad kala sakhi ruh ia ka jingkiew jong ki Case ne Person Bound Down hapoh ki kyndon bapher jong ka CrPC kaba la kynjoh sha ka 1938 bad 3 tylli ki ejahar la ujor ha kaba iadei bad ki kam ialap elekshon haduh ka 11 tarik u Iaiong 2024.
Haduh mynta ka jingioh kurup hadien ba la dep pynbna ia ka jingpyntreikam ia ka Model Code of Conduct (MCC) ka long T.43.13 Klur.
“Baroh ki jingdonkam la dep ban pynbiang lut nadong shadong, da kaba phaikhmat halor ka jinglong jingman jong ka suiñ bneng. Kumba 30,000 haduh 35,000 ngut ki briew yn pyndonkam na ka bynta kane ka elekshon ha ka jylla bad kine ki don ha ki bynta bapher bapher kynthup ia ki briew kiba la pynap lypa bad iaki bor pahara” la ong u Chief Electoral Officer ka jylla u Dr BDR Tiwari hynne ka sngi Baar.
Ula pyntip ruh ba ha kaba iadei bad ka jingpyndon bynta ia ki khynnah skul ha ki rynsan ialap elekshon ka dei kaba ka Tnad Election kala ioh jingtip bad u CEO ula pan ia ka kaiphod na u District Election Officer (DEO) halor katei ka bynta.
