Shillong, Nohprah 08 : U National General Secretary ka National People’s Party (NPP) James K Sangma ha ka sngi Thohdieng, ula ong ba ka party kan trei borbah ban jop ia ka Shillong Parliamentary seat ha ka elekshon Lok Sabha ban wan.
U James ula kam ba ka kyrtong ka NPP na Shillong bad Myntri Sorkar Ampareen Lyngdoh kala ioh bha ia ka jingkyrshan na u paidbah.
“Ka Elekshon hi ka dei ka elekshon. Kam donkam ban iaput turoi. Ngi hap ban trei bha kum ka party bad mynta ngi don ia ka kyrtong kaba biang bha, kaba la sdang ban iaid ialap bad kala ioh bha ruh ia ka jingkyrshan na u paidbah. Ngi la trei shitom kum ka party, kum ka iing bad nga tharai ba ngi kyrmen bha ba kan sei ia u soh ba bha” ula ong haba iakren bad ki nongthoh khubor.
Ka Shillong Parliamentary seat ka dei kaba la mihkhmat da u Bah Vincent H Pala jong ka Congress la 15 snem kynthih.
Haba kylli, u James ula ong ba ka jingiasih ki paidbah kan don beit ha ka elekshon bad kan trei la ka bynta pyrshah ia u MP ba mynta ka Shillong.
“Ngan nym ong ba kan ym treikam ha kaneka elekshon. Ka lah ban dei kawei kaba treikam ha ka elekshon hynrei ia ngi ruh, ka jingpynleit jingmut ka long ia ka kyrtong jong ngi bad ia kaei kaba ka iohi na ka bynta ka thain, ba kumno kan lah kum ka MP ban leh bha, leh ia kiei kiei kiba pher-khnang ba ka jingiaid ialap ruh kan iaid ha ka lynti kaba dei ym ban sdang kynthoh ia ki nongialeh pyrshah”.
Halor ka jingkynnoh u Bah Vincent Pala ba ka Sorkar MDA ba ialam da ka NPP kala pynslem ban pynrung ia ka ktien Khasi bad Garo ha ka Khyrnit ba Phra, u James ula ong ba kane kam dei satia kaba shisha.
“Baroh ngi tip ba ka ktien Khasi kala shem iala ka lynti bad kan hap ban poi sha Parliament hynrei kala rung pat ha ka thup bad ka ktien Garo kam shym la shah kynthup ha ka thup hynrei la pynrung noh ia ka da ka jingshimkhia ka MP jong ngi bad ka Party..Kala leit bad ki Nongialam ka NPP ban iakynduh ia ki Myntri ka Sorkar Pdeng. Nga tharai ban shu kynnoh ka long ka bym dei satia” ula ong.
Pule lang ia kane: Pynlong ka PNGRB da ka ‘Road Show’ ha Shillong ban kynjoh 100% ka CGD
Peit lang ia kane
