Shillong, Iaiong 16 : U MLA ka BJP Bah Sanbor Shullai ula ong ba da ka jingjop jong ka Kong Ampareen Lyngdoh bad Agatha Sangma, ngin pynthikna ia ka jingbun ki MP Khristan hapoh Parliament bad ha ka Sorkar.
“Lada baroh arngut ki shah jied, ki lah ban kren ia ki ishu bapher bapher kiba iadei bad ki paid Khristan bad da ka jingiadonlang ha ka Sorkar, kin jingkren jong ki kan kham jam bad shah skhor, ula ong.
U Bah Sanbor ula ong, kumta ki jingialap ba pyrshah Khristan da ki Liang Pyrshah kin shah jop noh lada baroh arngut ki shah jied na Meghalaya.
Une u MLA ka BJP ula ong ba ki MP na kiwei ki party ki lah ban leh khyndiat eh ha Delhi, haba kynthoh ba yn ym don ruh ba sngap ia ka sur jong ki hapoh ka Iingdorbar ka ban don khyndiat eh ki dkhot ka Liang Pyrshah namar tang ka kynhun NDA kan jop ia palat 400 seat kat kum ki jingkhein bala leh halor kane ka elekshon.
“Ban phah ia ka Congress ne ki seng riewlum kan lam sha ka jingsepei kai ia ki paidbah haduh 5 snem” ula ong haba ther tyngeh ia ki seng sain pyrthei bapher bapher kiba lapmiet ban kynthoh ia ka BJP ha ki lad pathai khubor.
U Bah Sanbor ula kyntu ia ki paidbah ban phikir khamtam ki samla bala nang la stad bad ki briew ba la nang la stad ka imlang sahlang ba kin nym ngop ha ki jingpynbiej jong kiwei pat ki seng sain pyrthei.
“Ka Meghalaya ka dei ban jam shakhmat ban pynleit jingmut ha ki ishu ka roi ka par. Ngim lah ban bteng ha kaban wanrah ia ki ishu ki ban pynpait pynpra ia ka imlang sahlang jong ngi. Lada ki nongthep vote bala nang la stad ki angnud ia ka Shillong kaba suk ba sain, ki hap ban pynsngew ia ka sur jong ki ha ka 19 tarik Iaiong, 2024” ula ong.
