Elekshon Lok Sabha : Ka Congress ka party ba lah iaklet, ka BJP ka bym pdiang, u Dr Mukul ula lip rong, ong u Heh NPP

Ym don Party ba buh jingma ia ka NPP ha Ri-lum Garo

Shillong, Rymphang 01: U Nongialam ka NPP bad Myntri Sorkar Marcuise N Marak ha ka sngi Balang ula ong ba ym don satia kawei ruh ka political party ka ban buh jingma ia ka National People’s Party (NPP) ha ka elekshon Lok Sabha ha Tura Parliamentary constituency.

Haba iakren bad ki nongthoh khubor, u Marak ula ong ba ka Liang Pyrshah Congress ka dei ka party, kaba la iaklet lut da ki paidbah ka Jylla namar kam don shuh ia ki nongialam kiba tbit bad ki.

“Namar kata, kan long kaba eh ia ki (Congress) ban poi sha u pud ba ki ju long mynshuwa” ula ong.

Ka Congress kala pynieng ia u MLA bala jop lai samoi na Gambegre bad Chief Whip ka Liang Pyrshah Saleng A Sangma ban iakhun pyrshah ia ka MP ka NPP ba mynta ka Agatha K Sangma.

Une u Nongialam ka NPP ula pynpaw ba um iohi satia ia u Saleng A Sangma kum ka jingma ia ka Agatha bad bynrap “Ka daw ia kane ka long namar ia ka Agatham ka Sorkar ka don bad ka Sorkar ka dei ruh kaba treikam bha…namar kata, ngi kyrmen ba ngin ioh ia ka jingkyrshan u paidbah. Ngi la pyrshang katba lah ban iadon ha syndah u paidah bad ban ai lut ia kaei kaba u paidbah u dawai”.

Haba kylli ia ka BJP kaba kyrshan ia ka Sorkar MDA, u Marcuise ula ong ba kane ka party saffron ka dei ka bym pat pdiang da ki paidbah jong ka Jylla.

“Ngi la iohi ha ka elekshon MLA ba dang shu dep, ki (BJP) la don 2 ngut ki MLA bad kila ioh biang 2 ngut. Namar kata, ngi lah ban pynkut ba kam dei ka party kaba la pdiang hapoh ka Jylla jong ngi” ula ong.

U Marak ula ong ruh ba ka jingpynieng ia u MDC ka BJP Bernard N Marak ha ka elekshon Lok Sabha ruh ka dei ka bym pdiang satia ha Ri-lum Garo. “U (Bernard)la don ha Tura la katto katne por bad kum u MDC ula iakhun nangne bad ngi la iohi ia ka result ha ka elekshon MLA. Kumta, kam don satia kano kano ka jingwit na ka jinglong kyrtong jong u” ula ong.

Nalor kane, une u Nongialam ka NPP ula ong ba u Nongialam ka TMC bad Myntri Rangbah barim ka Jylla Dr Mukul Sangma ruh u dei uba la lip rong kum u Nongialam bad um long shuh u jingma ia ka MP ba mynta ka Tura lada u rai ban iakhun ia ka elekshon Lok Sabha.

“U Dr Mukul ula lip rong. Kumta, ngim iohi shuh ban don ka jingma na u ruh kumjuh” ula bynrap.