Shillong Lber 02: Katba ki sngi ki nang jan sha ka elekshon Lok Sabha, ki nongkyrshan na ka seng Congress, UDP bad AITC ka Mawryngkneng Constituency, hynne ka Sngi Baar kila leit ban pyniasoh noh ialade bad ka seng NPP ban kyrshan ia ka kyrtong ka NPP Kong Ampareen Lyngdoh na Shillong Parliamentary seat.
Ia kine ki nongkyrshan la pdiang sngewbha sha ka NPP ha ka jingialang kaba la pynlong ha ophis treikam la NPP ha Lachumiere.
Ia kitei ki nongkyrshan la pdiang da u Working President ka NPP Bah Hamletson Dohling, u Nongaiktien ka NPP Bah HM Shangpliang, u CEM ka KHADC Bah Pyniaid Sing Syiem uba long u MDC ka Sohryngkham bad kiwei kiwei ki nongialam.
Haba iakren bad ki nongthoh khubor u Bah HM Shangpliang ula ong, ba kine kiba la wan rung sha ka NPP kidei kiba la wan ban ai jingkyrshan ia ka kyrtong MP ka NPP na Shillong Parliamentary Constituency ka Kong Ampareen Lyngdoh bad ban pynkhlain ia ka NPP.
Ula ong ba shen yn sa pynlong ia ka jingialang ha ka 6 tarik ha Mawryngkneng ha kaba yn pdiang burom ia ki nongialam bad ki nongkyrshan da ki shah ngut na ki seng saiñ pyrthei bapher kiban wan rung noh sha ka seng NPP.
“Katba nang mih ki sngi ka NPP kala nang khlain ha kylleng ki bynta jong ka Meghalaya da ka jingwan rung ki nongialam bad ki nongkyrshan bad kane kan pynthikna ba ki kyrtong ka NPP kin jop ia ka elekshon Lok Sabha” ong u Bah Shangpliang.
