Shillong, Iaiong 01: U Chief Electoral Officer (CEO) ka Jylla Dr BDR Tiwari ha ka sngi Nyngkong, ula lum ia ka jingialang bad baroh ki Political party ka Jylla kum shibynta ban iakren halor ka jingpynkhreh ia ka elekshon Lok Sabha, ka ban long ha ka 19 tarik Iaiong.
Haba iakren bad ki lad pathai khubor, u Tiwari ula pyntip ba kane ka jingialang ka dei kaba la pynlong haba iadei bad ka jingpynbeit ia ka por ba ki Political party kin pathai ia ki khubor jong ki ha ka All India Radio bad ka Doordarshan.
“Namar kata, yn sa ai ia ka voucher jong ka por da ka Election Commission of India ia ki National bad State Political party bala ithuh” ula ong haba bynrap ba ka jingialang ka long ruh ban batai ia ki ba kumno ki lah ban ioh ia kane ka jingai por jong ka ECI ba kin pathai ia ki khubor jong ki sha ki paidbah na kine ki lad pathai.
Halor ka jingpynkhreh ia ka elekshon ha Jylla, u CEO ula pyntip ba namar ka jingwan ka aiom slap, la bthah ia ka Tnad Education bad ka Revenue & Disaster Management ba kin shim ia baroh ki sienjam ba donkam haba buh ha ka jingmut jingpyrkhat ba kiba bun ki Polling Station ki dei kiba la pynlong ha ki skul.
“La bthah ruh ia u Chief Secretary ba un shong bishar halor kane ka kam bad ki Tnad ba don bynta” ula ong.
“Ngi kwah ban pynthikna ba ka leit ka wan kam dei ban shah ktah bad ba dei ban pynbiang ruh ia ki jaka rieh slap bad kiwei kiwei ki jingdonkam ha baroh ki Polling Station (na ka bynta ka bit ka biang jong ki nongthep vote ha ka sngi thep vote)” ula bynrap.
Kat kum ka jingong jong u, ka jingdon jong ki Polling Station kala nang kiew naka 3512 tylli sha ka 3482 tylli ha ka elekshon MLA 2023 ha Jylla.
Ha kajuh ka por, u CEO u pyntip ba namar ka Meghalaya ka dei ka green state, ka ECI kala rai ban shim ia ka sienjam ha kaban pynlong ia ka green election.
“Mynta ka suin bneng ruh ka biang bha ban thung dieng, kumta ngi la shim ia ka sienjam ban iathung dieng ha kaban pynlong ia kane ka elekshon kaba jyrngam bad ba sah jingkynmaw. Ha man kawei pa kawei ka Polling Staton, ngin sa iathung artylli ki symbai dieng bad kito ki ban thung ia kine ki dieng kin dei na ki nongthep vote shynrang bad kynthei kiba wan thep vote nyngkong eh” ula bynrap.
 ka Jylla Dr BDR Tiwari ha ka sngi Nyngkong, ula lum ia ka jingialang bad baroh ki Political party ka Jylla kum shibynta ban iakren halor ka jingpynkhreh ia ka elekshon Lok Sabha, ka ban long ha ka 19 tarik Iaiong.){kind=link}