Shillong, K’Lyngkot 29: Ka Meghalaya Bharatiya Janata Party (BJP) ka dang pynkhreh ban pynbna iaki kyrtong ki ban iakhun haka ilekshon MP na Shillong bad na Tura Parliamentary Seat.
Haba pyntip ia kane u nongialam ka Meghalaya BJP u Bah A.L Hek u badei ruh u Myntri Sorkar ula ong ba ki don bun kiba la pynpaw ba ki kwah ban iakhun haka ilekshon MP 2024 na Shillong Seat kynthup ka Kong Fenela Nonglait bad u President barim ka Meghalaya BJP u Bah Ernest Mawrie nalor kiwei kiwei de.
U Bah Hek ula iathuh ba ka BJP kadei na National Party bad iaka rai ba khatduh haba iadei bad ki kyrtong yn shim hi da ki nongialam ka BJP na Delhi.
Haba kylli hato u kwah ne em ban iakhun na Shillong Seat, u Bah Hek ula ong “Lada ka Party ka jied ia nga mynta ka kynti, mynta u snem te ngan nym ong em”.
Haba iadei bad ka Tura Parliamentary Seat, u Bah Hek ula kam ba um don jingtip hynrei la don uwei u rangbah na Tura uba la mih shakhmat ban pan Ticket ban iakhun haka ilekshon MP.
“Mynta ka janmiet kan don ka jingialang jong ka Meghalaya BJP haka jingdon lang u Myntri khynnah ba khmih iaka tnat ka rep ka riang u Kailash Choudhar bad ki nongialam ka BJP bad ha kane ka jingialang kan ruh ka jingiakren halor ka jingpynkhreh iaka ilekshon MP” ula ong.
Haba kylli halor ka jingdon ki nongkitkam ki bym hun iaka rukom treikam ka Meghalaya BJP, u Bah Hek ula ong “Kam don kum kata. Ngi don da u President ba thymmai bad baroh ki trei naka bynta ka bha ka miat jong ka Party, ki paidbah bad ka Jylla bad lada phi kylli ia nga, kam don satia kum kata kaba phi kylli”.
 ka dang pynkhreh ban pynbna iaki kyrtong ki ban iakhun haka ilekshon MP na Shillong bad na Tura Parliamentary Seat.){kind=link}