Guwahati, Lber 18: U Myntri Rangbah ka Assam u Himanta Biswa Sarma hynne ka sngi Nyngkong, ula kam ba baroh ki kyrtong ka Congress kiban jop ia ka elekshon kin sa pyniasoh noh bad ka BJP hadien ka elekshon.
U Himanta uba la sdang ia ka ia ka jingialap elekshon na Karimganj, ula ong ba yn pynthikna ba hadien ka elekshon, baroh ki kyrtong kiba jop na ka seng Congress kin pyniasoh noh bad ka seng BJP.
“Ki kyrtong ka Congress kin sa pyniasoh noh bad ka BJP, kan don jingmut aiu ban vote ia ki. Kito kiba jop na ka tiket Congress kin pyniasoh noh bad ka BJP. Ka jingkylli kaba hakhmat duh ka long, hato ki kyrtong ka Congress kin dang neh hi hapoh ka seng Congress. Mynta ka kynti mano mano ruh kiba iakhun na ka seng Congress. Nga lah ban wan ialam lut ia ka sha ka seng BJP hynrei lait noh tang ia uwei hi” ong u Himanta.
Ula ong, baroh kane kadei namar ka jingtbit bad ka jingstad hapoh ka jingialam u Myntri Rangbahduh ka ri u Narendra Modi.
“Kane baroh ka burom kan leit sha u Modi, ka jingiohjngai ka jong u Modi kadei ban ai ia ka roi ka par ia baroh bad mynta ka kynti baroh ki ritpaid kin kyrshan bad vote ia ngi, namar mynta kila ioh ia ki kam sorkar khlem da donkam ban ai da ka pisa” ula ong.
Nalor kane ula ong, ba ka BJP kan jop ha Karimganj bad Nagaon ha ka elekshon MP Lok Sabha.
“Ngi ngin jop ia ka Karimganj seat da palat 1 lak vote. Ki ritpaid kiba don ha ka jylla kin vote ia ka BJP mynta ka kynti, namar ngi la jop bad ioh ia ka jingshaniah da ki kam kiba bha. Ha ki sngi jong ka seng Congress, ki samla pule kiba dei ki ritpaid kim shym la iohkam hynrei mynta kila ioh kam sorkar, khlem da donkam ban pynbam da ka pisa” ula ong.
