Elekshon Lok Sabha : 5 ngut kiba kwah ticket BJP na Shillong, 6 na Tura

0
86

Shillong, Lber 15 : U President ka BJP-Meghalaya Rikman G. Momin, ula pyntip ba ka party kala phah haduh 5 tylli ki kyrteng sha Delhi kiba kwah long kyrtong ban iakhun ia ka elekshon Lok Sabha na Shillong Parliamentary Constituency bad 6 ngut na Tura Parliamentary constituency.

U pyntip ba u Nongialam ka BJP bad Myntri Sorkar Bah A.L.Hek u dei uwei na kiba paw kyrteng napdeng kine ki 5 ngut kiba kwah iakhun na Shillong.

Haba pyntip ia kane, u Rikman ula ong “Ngi ladep phah ia kine ki kyrteng jong ki kyrtong sha ki nongialam ha Delhi”.

Nalor u Bah Hek, u Momin u pyntip ba kiwei pat kiba pan ticket ki dei ka Dr Fenela Lyngdoh Nonglait, u President barim ka BJP Bah Ernest Mawrie, u President ka BJYM Mewaker Lyngdoh bad Sumitra Laloo.

Ia ka Tura seat, kiba pan ticket ki kynthup ia u MDC ka Tura Bernard N Marak, u MLA barim Winnerson D Sangma bad KC Boro, u MDC barim Boston Marak, Ria Sangma bad Thomas Marak.

Haba kylli, u Momin ula ong “Ngim pat tip (lano kin pynbna ia ka kyrteng ki kyrtong) hynrei ka thup kyrteng kaba lai kan sa mih shen”.

Nalor kane, une u Nongialam ka BJP ula ong ba ka BJP kala pynkhreh bha ban mih iakhun ha kane ka elekshon. Kat kum ka jingong jong u, ka Party kala dep sdang ban iaid ialap kylleng ki jaka.

Haba kylli, ula ong ba ka Citizenship (Amendment) Act, kan ym ktah satia ia ka BJP ha ka elekshon Lok Sabha ha Meghalaya.