Shillong, Rymphang 20: Namar ka elekshon KHADC ban long ha ka 21 tarik, ki bor District ka East Khasi Hills ki la pynkhreh shaid shaid ia ki jingdonkam baroh ban lah pynlong ia ka jingthep vote kaba iaid beit, iaid ryntih.
U Additional Deputy Commissioner (ADC) ka East Khasi Hills Bah Ronnie Wahlang, uba peit ia ka elekshon u la pynpaw ba ki jingpynbeit ki la long kiba bniah bha, ha kaba ki ophisar bad ki nongtrei ki la trei shitom ban pynthikna baka jingthep Vote haka 21 tarik kan long kaba iaid beit iaid ryntih.
Ia ki tiar ban pynlong iaka jingthep vote la kit na ISBT Mawlai ban leit shaki 13 tylli ki constituency katba mar 2 tylli yn phah na ophis u SDO Civil kiba don ha Sohra bad Pynursla Sub-division.
U la pyntip ba ki kynhun pyniaid elekshon na ka bynta ki 13 tylli ki polling station kiba hap hapoh ka Mawphlang, Mawkynrew, bad Nongkrem District Council Constituency (DCC) ki la don mynta ha lynti hala ki jong ki Polling Station ha kaba 6 tylli ki kynhun ki leit sha Mawphlang, 5 tylli sha Mawkynrew, bad 2 tylli sha Nongkrem.
Kine ki jaka thep Vote ki long kiba jngai bha bad ki kynhun ki donkam iaid kjat.
Ki kynhun ba dang sah, kiba kynthup kumba 720 tylli ki station, kin mih lashai ka sngi na ISBT sha la ki jong ki jaka.
Ki bor pyniaid ki la shim ruh ia ki sienjam ban pynthikna ia ka jingiakren kaba iaid beit iaid ryntih bad ka jingbha jingmiat jong ki nongpyniaid thep vote. La phah ruh ia ki kynhun ai jingsumar ban weng ia kino kino ki jingeh ha ka koit ka khiah shwa ba ki heh Sorkar kin leit sha ki kam jong ki.
Nalor kata, la ailad ïa ki briew Sorkar kiba don ha ka kam pyniaid thep vote ba kin thep vote lyngba postal ballots ha ISBT hi.
U ADC u la pynpaw ba ka ilekshon kan long ha ka rukom kaba laitluid bad kaba beit bad ban pynthikna ïa ka jingïaid lynti kaba khuid bad ka synshar paidbah na ka bynta ki paidbah ka East Khasi Hills.
