Nongpoh, Rymphang 20: Ka jingpynkhreh na bynta ka sngi thep vote na bynta ka Khasi Hills Autonomous District Council (KHADC) ha ki san tylli ki Konstituensi jong ka Ri Bhoi District ka la iaid shaphrang bad la sakhi ba ki polling ophisar kila iamih napoh ka District ban leit sha la ki jong ki Polling station ha kitei ki 5 Konstituensi.
Kumba la long, na ka liang ki bor pyniaid district ka Ri Bhoi, ki la pynbit pynbiang bha ruh naduh ki bor pahara ha ki polling station jong ki san tylli ki Konstituensi ba kynthup naduh ka Nongpoh, Jirang, Umsning, Mawhati bad Umroi.
Katkum ka jingiathuh ka Kong Balakyntiew Rani, ka Additional Deputy Commissioner, la pyntip ba ki don haduh 331 tylli ki polling station ha kitei ki Konstituensi bad napdeng kine, kumba 16 tylli ki polling station ki dei ki bym don jingshngain (Vulnerable) bad 14 tylli kiba don hapdeng ka jingma (Critical).
Ka la pyntip ruh, ba na ka liang ki bor district ki la pynbit pynbiang bha da ki bor pahara da ki pulit kynthei bad shynrang ha baroh ki polling station ban pyntikna ba ka jingthep vote kan long kaba iaid beit iaid ryntih kynthup ruh la buh bun ki pulit kynthei ha kito ki polling station ba don bun ki nongthep vote kynthei.
La pyntip ba ki nongtrei sorkar kiba la buh kum ki Polling Personnel kiba la pynkhreh bha, ki la sdang ban leit noh sha ki polling station ba la pynkhamti ban pyniaid ia ka jingthep vote. Kine ki la mih naduh mynnin ka sngi bad hynne ka sngi ban leit shala ki jong ki Polling Station.
