Shillong, Rymphang 15 : U President ka National People’s Party (NPP) ka Jylla bad Symbud Myntri Rangah Bah Prestone Tynsong ula kular ban pynbeit noh ia ka kam ba iadei bad ka jingkhang ban tih maw bad shyiap ha Jyla ha ka jingialap elekshon ba long ha Laitkroh ha ka sngi Siatjain.
Ula kyrpad ruh ia ki paidbah ka Saitsohpen, Sohra ba kin pynkheh ha ka ban pdiang ia ki jingkyrkhu hadien ka elekshon ADC haba kren ha ka jingialang paidbah ha ka miet sngi thohdieng.
Haba kyntu ia ki paidbah ban vote ia u pyrsa Rahboklang Tynsong, uba dei u kyrtong ka NPP na Langkyrdem-Laitkroh, u Bah Prestone ula ong “Ngi kwah ban kyntiew ia ka roi ka par ha baroh ki liang hapoh ka constituency bad ka Jylla baroh kawei. Hadien ka 24 tari Rymphang, ym tang ba phin ioh ia u MDC hynrei phin ioh ruh ia u Bah Prestone kum u Kpa. Ngan iai bteng ban don ryngkat bad phi bad nga kyrpad ia phi ban ailad ia u pyrsa jong nga ban long ka pyrnon hapdeng ka elaka jong phi bad ka iing bad ka ophis jong nga ha Secretariat.
“Khlem pep, ka jingkhang ban tih maw bad tih syiap kala ktah bha ia ka kamai jakpoh jong ki paidbah. Kumta, nga kyrpad ia phi ban ap ia ka porkaba biang bad nga kyrpad ba phin shaniah ia nga, kum uwei uba ju dei u MLA jong phi (shuwa ka jingphiah constituency) bad ruh ban shaniah ia ka NPP kala ialam ia ka Sorkar, ba ngin pynurlong ia ka jingangud jong phi khnang ba ngin im ym ban iap jingit. Nga kular ha phi ia kane sha ki paidbah ka constituency” ula kular.
Ula kular ruh ban khmih ia ka hukum ba dang shen ban khang ia ka jingiakop dur masi bad ong “Ha ka jingshosha, kam ju don ka jingiadur masi hynrei ki don ki seng ba na shabar, kiba la phah ia ki dur ba don ka jingiakop iasur masi sha Delhi bad ka Sorkar kala phah ia ka shithi ba pan ia kaiphod halor ki sienjam bala shim halor kane ka kam… Ngan sa iakynduh ia ki nongialam hadien kane ka jingialang ban iakren ia kane ka kam bad nga kyntu ia phi ban nym pynlong ishu naba ngan shim ia ka jingkitkhlieh ba pura ban pynbeit ia kane ka kam”.
U Symbud Myntri Rangbah ula kyntu ia ki paidbah ba kim dei ban ngop ha ki jingpynbeit jong ki briew, kiba tbit ban kren tang ha ki surok bad ong “Ngam kwah ban kren palat hynrei nga kyntu ia phi ba sngewbha shaniah ha u Bah Prestone”.
Ha ka jingialap elekshon ha Saitsohpen, Sohra ha ka miet sngi Thohdieng, une u Nongialam ka NPP ula ong “Ngi la iakynduh la saw sien ia ki nongialam jong ka Elaka bala ialam da u Sordar. Ngi tip bha ia ki jingeh joong phi bad sngewsih bad haduh mynta ngim shim la lah ban shim ia ka rai ba khatduh halor kane ka kam”.
“Ngam shym wan hangne ban pynbiej ia ki paidbah namar ngi donkam ban ashong sa shisien ka jing ialang hashuwa ba ngin poi sha ka thong. Kane kam dei ka rynsan ba ngan ong ia phi ba phin kynmaw ia ngi halor ki kam ba bha ong ngi namar ngim donkam ban ong eiei hynrei ka jingshisha hi ka long ba ka jingeh kala don la bun bun snem bad ym shym la don ba pynbeit ia ki hynrei dei tang ka NPP kaba lah ban pynbeit noh shisyndon” ula ong.
Hab kdew ia kajuh ka jingshem jong ki paidbah ka Williamnar haba iadei bad ka jaka Sorkar, u Bah Prestone ula ong “ Ha u snem bala leh, ka Kynhun Myntri jong ngi kala iakren ia kane ka kam ba kumno ngin pynbeit ia ka. Ka long kumjuh ha Williamnagar ha kaba ngi la lah ban pynbeit ia ka. Namar ngim kwah ia ka jingiasngewthuh bakla bad ba ki paidbah ka Williamnagar kin nym mad jingeh, kumta ngi lah pynbeit ia kane ka kam bad ki briew ka Williamnagar bad ki briew mynta kila ong ba ka NPP ka dei shisha ka jingkyrkhu ia ki”.
“Kumta, nga kular ia phi ba hadien ka elekshon MDC, ngan sa khot ia ka jingialang ban pynbeit ia kane ka kam bad ngan sa wanrah ha ka jingialang ka kynhun Myntri bad long kiba la khreh ban pdiang ia ki jingkyrkhu” ula ong.
Une u Nongialam ka NPP ula kyntu ia ki paidbah ka Sohra ba kin ai ka jingkyrshan ia u kyrtong ka NPP bad u MDC barim Bah Donnevan Wahlang ban wanrah ia ka roi ka par ha baroh ki liang hapoh ka constituency.
Ula pyntip ba ki don katto katne ki project ba kongsan kin sa sdang noh shen hapoh ka thain kiban ai jingmyntoi ia ki paidbah ka Saitsohpen bad ka Sohra.
 ka Jylla bad Symbud Myntri Rangah Bah Prestone Tynsong ula kular ban pynbeit noh ia ka kam ba iadei bad ka jingkhang ban tih maw bad shyiap ha Jyla ha ka jingialap elekshon ba long ha Laitkroh ha ka sngi Siatjain.){kind=link}