Thalain tyngeh ia ki MLA ka Liang Pyrshah ba kynnoh leh shiliang ha ki kam pynroi
Shillong, Rymphang 17 : U President ka National People’s Party (NPP) Meghalaya bad Symbud Myntri Rangbah Bah Prestone Tynsong ula kular ba ka NPP kala rai kut shisha ban kyntiew ia ka roi ka par ka Ri-War haba kular ban sa pynkylla ia ka Iew Pynursla kum kawei pat ka Police Bazaar (Khyndailad) hapoh u 2028.
Ula ther tyngeh ruh ia ki katto katne ngut ki MLA ki bym lah ban wan tied ia ki jingkhang jong ka Secretariat na ka bynta ka roi ka par ka constituency jong ki hynrei kiba kloi pat ban shu kynnoh ia ka Sorkar ba ka peit shiliang khmat.
Haba ialap elekshon ha ka sngi Nyngkong ban pan jingkyrshan ia ka MDC ka Nongshken Kong Grace Mary Kharpuri bad kyrtong ka Langkyrdem-Laitkroh Bah Rahboklang Tynsong ha Pynursla, u Bah Prestone ula ong “Ngi la rai kut ban wanrah shuh shuh ia ki kam pynroi hapoh ka constituency, ka Ri War bad ka Jylla baroh kawei. Ngi kwah ban shna ia ki jaka pynieng kali kaba thikna da kaba pynkynkynriah ia ka Ophis ka PWD sha kawei pat ka Jylla bad ngin pynlong ia kane ka jaka kum kawei pat ka Police Bazaar. Kan dei ka jingkyrkhu kaba khraw ia ka Ri-War. Nga kular ba hapoh u 2028, ngin pynthikna ia ka jingkylla kaba pura ha kane ka jaka. Kane kan jia da kaba iatrei ryngkat ryngkat bad ki Dorbar Shnong”.
U Symbud Myntri Rangbah ula pynpaw ruh ia ka jingsngewkhia halor ki jingkynnoh pyrshah ia u bad ia ka Sorkar jong u ha ki rynsan social media bad ong ba wat hapdeng ka jingpyrshang ban pynsaphriang ia ki jingpyntip ba bakla da ki Liang Pyrshah, ki paidbah ka Pynursla kim dei ki briew kiba suk ba kin pynngop.
“Ki paidbah ka Pynursla ki dei ki briew ba don burom bha bad ka dei namar jong phi nga long kumne kumba long mynta. Kumta, nga kyrpad ia ki paidbah ka constituency jong nga ba kin ai ka jingkyrshan ba pura ia I Kong Grace Mary Kharpuri bad Bah Rahborlang Tynsong bad pynthikna ba kine arngut kin ioh ia ka jingjop khnang ba kin long ka kti ka mon ka kti ka diang jong nga ha kaban trei na ka bynta ka roi ka par jong ka constituency” ula ong.
“Khlem artatien, ki don khyndiat eh ki skhim ha ki ADC hynrei ka biang beit namar da ka jingiatreilang jong ki bad nga, ki skhim kin wan tuid kum ka duriaw ha ka constituency. Kumta, phi dei ban pynthikna ba baroh arngut ki kyrtong kin ioh ia ka jingjop ha kane ka elekshon ADC” ula kular.
Ula kam ruh ba ki Liang Pyrshah kim don nia shuh haba ka Sorkar kala pynthikna ban pynurlong shisha ia ka jingwanrah ia ka Mini Secretariat ha Pynursla bad ong “Nga la kut jingmut hok na ka bynta ka roi ka par jong kawei pa kawei ka shnong hapoh ka constituency. Hadien ba dei ka surok Two-Lane, kan dei ka jingkyrkhu ia ka Ri War. Ngi long kiba donkam ba ngi iadonlang ha ka Sorkar. U Blei ula kyrkhu ia ka Langkyrdem constituency kaba rim, Pynursla constituency namar nga ju ioh beit ia ka shuki ha Secretariat (naduh ba iakhun elekshon). Kane ka dei ka samoi kaba san jong nga bad phi lah ban khmih lynti ba bun ki pihuin. Ki don bun ki jingpyrshang ban tan ia ngi shapoh hynrei ngin ym ailad satia da lei lei ruh”.
Halor ka jingkynnoh ki Liang Pyrshah ba ka Sorkar ka leh shiliang, u Bah Prestone ula ong “Kumno phin kynnoh ba nga leh shiliang haba ngam ju iohi ia phi ban wan iakynduh ia nga hapoh ka kamra jong nga?. Lada phi kwah kam pynroi, wan sha Secretariat bad kyrpad ia u Bah Prestone ban iarap ia phi”.
Ula ther tyngeh ruh ia kawei ka seng sain pyrthei ba ka ong ba tang ka jingieid ia ka Jaidbynriew kala biang eh bad ba ki paidbah kim donkam ia ka roi ka par haba ai pat ia ki jingkular hakhmat jong ki ha ka por elekshon.
“Ka dei ka kamram jong uwei pa uwei u MLA lane MDC ban wan tied ia ka jingkhang jong ka Secretariat na ka bynta ki kam pynroi hala ki jong ki constituency. Hynrei, ka long kaba sngewsih ba katto katne na ki MLA kim shym la leh ia kata bad kane kala ktah jur bha ia ka constituency jong ki khamtam eh ia u paidbah” ong u Bah Prestone.
“Kumta, nga kyrpad ia phi ban nym shah ia kum kine ki nongialam ba kin pynbiej ia phi da kaba kam ba ki ieid ia ka Jaidbynriew.Ka jinglehbha ka sdang nala Iing. Phi dei ban wanrah shwa ia ka jingkylla kaba donkam ha la ka jong ka constituency shwa ba phin kren heh ban wanrah ia ka jingkylla ha ka jylla baroh kawei. Ka dei ka kamram jong uwei pa uwei u MLA ne MDC ban weng ïa ki jingeh kiba ki paidbah jong ki constituency jong ki ki ïakynduh,” bynrap une u heh jong ka NPP.
 Meghalaya bad Symbud Myntri Rangbah Bah Prestone Tynsong ula kular ba ka NPP kala rai kut shisha ban kyntiew ia ka roi ka par ka Ri-War haba kular ban sa pynkylla ia ka Iew Pynursla kum kawei pat ka Police Bazaar (Khyndailad) hapoh u 2028.){kind=link}