Riangdo, Rymphang 17 : “Ka NPP mynta ka dei kaba la pdiang da u paidbah naba kala jam ha ka lynti ban wanrah ia ka roi ka par ha baroh ki liang” ong u Bah Gardinal Sohshang, kyrtong ka NPP ka Mawshynrut constituency.
Haba kren ha ka jingialang ialap elekshon hala iing ha Jenpih, Riangdo, West Khasi Hills, u bah Sohshang ula ong “Ka jingialap elekshon jong nga kala iaid bha bad ki paidbah kila pyni ia ka jingieid bad jingkyrmen ia ka NPP namar kane ka Sorkar ba mynta kaba theh shibun ki kam pynroi, ka dei kaba pyniaid da ka NPP”.
Ula ong ba hadien ka jingjop ia ka elekshon, un trei shitom ban iada ia ka riti dustur u Khasi, ban nang pynkhlain ia ka Khasi Social Custom of Clan Administration, 2020, kaba pynshitom ia ki bar jylla ban shim jait Khasi nalor kiwei kiwei.
U Bah Gardinal ula ong ‘Watla hynriew ngut ki kyrtong kila mih ban iakhun ha ka elekshon KHADC na Mawshynrut hynrei u kyrtong ba u hap iakhun u dei jong ka Hill State People’s Democratic Party (HSPDP)” haba bynrap ba ki don palat sawphew hajar ki nongthep vote ha Mawshynrut kynthup ia shiphew hajar vote ki paid Garo bad kiba tam ki dei ki Khasi.
U Bah Gardinal ula pynpaw ia ka jingsngewskhem ba un ioh hapdeng khatsaw haduh arphew hajar vote ha kane ka elekshon.
Lah ban kdew ba u kyrtong ka HSPDP Bah Methodius Dkhar ula jop da 5187 vote ia u kyrtong ka NPP bad MLA barim Bah Gigur Myrthong ha ka elekshon MLA 2023.
Ula ong “Haba nujor ia ka elekshon MLA 2023, ki don tang 3-4 ngut ki kyrtong kiba iakhun na ka constituency hynrei mynta kila don bun ba kynthup ia ka NPP, BJP, INC, HSPDP, VPP, UDP bad kyrteng shimet. Kumta nga sngewskhem ba ngan jop na Mawshynrut constituency. Ki paidbah ka Mawshynrut ki sngewthuh ba ka NPP ka dei kaba pyniaid ia ka Sorkar Jylla bad u kyrtong ka NPP un wanrah ia ka roi ka par ha kane ka constituency. Kumta nga sngewskhem bha ba ngan jop”.
Lah ban kdew ba ka NPP kala iakhun haduh 25 tylli ki constituency napdeng ki 29 tylli ha kane ka elekshon KHADC lait noh ka Mawlai, Jaiaw, Laban-Mawprem bad na Nongkrem.
