Shillong, Rymphang 15 : U National President ka National People’s Party (NPP) Conrad K Sangma ula pynpaw ia ka jingkyrmen ba ka NPP kan ioh ban bat biang ia u lakam ka jingsynshar ha KHADC bad JHADC hadien ka elekshon ban long la 21 tarik u Rymphang.
U Conrad ula pynpaw ia kane ha ka rynsan ialap elekshon ban pan jingkyrshan na ka bynta u MLA ka Jirang bad kyrtong ka NPP Bah Sosthenes Sohtun, u ban aireng ha kane ka elekshon KHADC ban wan.
U Conrad ula ong ba kane ka elekshon ADC ka long kaba kongsan bha bad bynrap “Bun ki seng sain pyrthei kila pyrshang ban pynshit ia u paidbah da ka jingsngew iapher jaidbynriew ha kane ka elekshon. Kila pyrshang ban phiah bad pyniapait iapra ia ki briew jong ngi. Ka NPP ka dei kaba burom ia baroh ki jaidbynriew bad kala trei ban wanrah ia ka roi ka par ia baroh. Ngi hap ban iatylli bad vote ia ka NPP ban ai ka jubab kaba biangeh ia ki seng sain pyrthei kiba bet ia u symbai ban iabuh shun bad jingbym shaniah”.
Haba pynpaw ba ka Jylla Meghalaya ka dei kaba tip ia ka jingdon ki nongshongshnong kiba ieid ia ka jingsuk, ula kyntu ia ki paidbah ba kin pyrkhat ia ka lawei jong ka Jylla bad ban iatylli ha kaban vote ia ka NPP.
“U MLA jong ngi Bah Sosthenes Sohtun ula shim ia ka bynta ban iatei kum u MLA bad ula pynthikna ia ka jingwan ki kam pynroi bapher bapher hapoh ka constituency ha kine ki hynniew snem bala leit. Ka long kaba donkam ban vote ia u kum u MDC ban ailad ia u ba un treikam bad ka Sorkar ha kaban pynkhlain ia ka District Council”.
U Conrad ula iaroh ia u Bah Sosthenes kum u nongialam bad ka jingaiti jong u ban trei na ka bynta u paidbah. “U ju kren beit man ka por ia ki kam ba iadei bad ka jingiakajia khappud bad ka jinglong ka suk ka sain kiba mih ha khappud bad ju phah tuklar beit ha ka Sorkar” ula bynrap.
Haba pynpaw ba ki don beit ki jingeh ha man ki ki kyrdan bapher bapher, u Conrad ula ong ba ki District Council ki shim ia ka bynta ba kongsan bha ban pynlong ia ka jingiakren, iasyllok bad ban iada ia ka bha ka miat jong ki jaidbynriew riewlum trai ri trai muluk.
“Ka lyer jong ka NPP ka khlain bha ha baroh san tylli kii constituency ka Ri-Bhoi. Ki paidbah ka District kila pyni ia ka jingshaniah ha ki nongialam jong ka party bad ngi ngeit skhem ba ha ka result jong ka elekshon ADC kan long kaba noh sha ka NPP” ula bynrap.
Haba pynpaw ia ka jingsngewskhem ban ioh bat biang ia ka bor ha KHADC bad JHADC, u Conrad ula ong ba ki Executive Committee ha baroh artylli ki Council kin dei kiba ialam da ka NPP.
“Kiba bun ki MLA ba mynta na kiwei ki party kila kren pyrshah iala ka jong ka party. Kila kular jingmut bad duh jingshaniah hala ki jong ki nongialam. Kila kren paidbah pyrshah iala ka party. Kane ka dei ka dak kaba paw shai ba kila pdiang ia ka jingshahrem bad kren ruh ha kyleng ki jaka ba ki paidbah ki dei ban mih bad vote ia ka NPP” ula ban jur.
Haba pyntip ba ka 39th National Games 2027 kan long ha Meghalaya, u Conrad ula ong ba ka dei ka khyllimar kaba sngew sarong ia ka Jylla. “Ngim ju poi pyrkhat ba ka National Games kan wan long ha Jylla. Hynre mynta ka Indian Olympics Association bad ka Sorkar India ka ngeit skhem ha ka jingiohi jngai jong ngi ban lntiew ia ka kam ialehkai hapoh ka Jylla.
 Conrad K Sangma ula pynpaw ia ka jingkyrmen ba ka NPP kan ioh ban bat biang ia u lakam ka jingsynshar ha KHADC bad JHADC hadien ka elekshon ban long la 21 tarik u Rymphang.){kind=link}