Shillong, Rymphang 01 : Baroh ki kyrtong ban iakhun ia ka elekshon MDC na Mawlai constituency, kila pynpaw ba ki hun ia ka jingpynbeit jong ka Mawlai Town Dorbar (MTD) ban pynlong da ki “Common Platform” kum ka rynsan ialap elekshon lait noh u kyrtong ka Voice of The People Party (VPP) uba pynpaw ia ka jingartatien ban iashimbynta.
Kane ka sur jong ki kyrtong kala mih na ka jingialang jong ka Mawlai Town Dorbar (MTD) bad ki kyrtong, kaba long hynne ka step ha Mawlai Kynton Massar, ban iapyrkhat biang ia ka rai bala shim ha ka 22 tarik Kyllalyngkot, hadien ba mih ki jingpyrshah bad ki jingshah kynthoh ha ka Voice of the People Party (VPP).
U kyrtong ka VPP Eddie Kharumnuid ula pynpaw ba um lah satia ban shim rai nalade haba pyntip ba ka VPP ka lah dep pynbeit ia ki jingialang paidbah ne Public Meeting.
Lah ban kdew hangne, ka VPP kala dep leit pynbna ha kiba bun ki Shnong ha Mawlai ba kan pynlong ia ka jingialang paidbah ban ialap elekshon. La shibit janmiet kan pynlong ia ka jingialang paidbah ha Mawlai Syllaikariah.
Kiwei ki kyrtong kila pynpaw ba ki hun beit ia kaei kaba ka MTD kala pynbeit bad ki kloi ruh ban iatreilang bad ka Town Dorbar ban pynlong ia ka rynsan ialap elekshon da ki “Common Platform” ha man ki shnong.
Kine ki kyrtong ki dei u kyrtong shimet Bah Teibor Pathaw, Bah PT Sawkmie, Bah Seibor Lyngdoh Nonglait, kyrtong Congress Bah Wanseng Jyrwa, bad kyrtong BJP Kong D.Lyngdoh Nonglait kaba la shu phah ktien namar ka jingbym poi sha ka jingialang na ka daw ka jingleit thep kyrteng ialade kum ka kyrtong.
Halor kane ka sur, ka MTD kala kyntu ia kine ki kyrtong ba kin wanrah da ka jingthoh hapoh ka 4 tarik Rymphang, kaba pynpaw ba ki kloi ban iashimbynta ha ki Common Platform.
La iamynjur lang ruh ba ki kyrtong ki lah ban pynlong ia ki Jingialang paidbah ne Public Meeting haduh ka 4 tarik Rymphang shuwa ban sdang ka Common Platform.
Kumban shu pynkynmaw, ka MTD kala dep ban pynkhreh ia ka prokram ban pynlong ia ki Common Platform ha baroh ki 17 shnong jong ka Mawlai, ka ban sdang naduh ka 5 tarik Rymphang na Mawlai Syllaikariah.
Ia kane ka prokram “Common Platform” jong ka MTD la dep ruh ban ai jingbit da ka Ophis ka District Election Officer (DEO) ka East Khasi Hills District.
 ban pynlong da ki “Common Platform” kum ka rynsan ialap elekshon lait noh u kyrtong ka Voice of The People Party (VPP) uba dang hap ap ia ka rai jong ki Nongialam ka party.){kind=link}