Elekshon KHADC | Hiar u CM ha Nongstoin | Kyntu ban nym ia ngop ha ki jingkynnoh lamler

Ka NPP ka kut jingmut hok ban kyntiew ia ka roi ka par ka Jylla

Shillong, Rymphang 11 : U National President ka National People’s Party (NPP) bad Myntri Rangbah ka Jylla Conrad K Sangma hynne ka sngi Ba-ar, ula hiar ialap elekshon ha Nongstoin bad kyntu ia ki paidbah ba kim dei ban ngop ha ki jingkynnoh lamler jong ki seng sain pyrthei bapher bapher.

U Conrad ula hiar sha Nongstoin ban pan jingkyrshan ia u kyrtong ka NPP na Nongstoin constituency Bah Dressar Marngar ha ka elekshon Khasi Hills Autonomous District Council (KHADC), ka ban long la 21 tarik Rymphang.

Haba kyntu ia ki nongthep vote ba kim dei ban ngop ha ki jingkren jong ki seng sain pyrthei kiba pyrshang ban “pynthame” bad pynsaphriang ia ki jingtip ba bakla, une u Khliehduh ka NPP ula pan ia ka rai u paidbah ban kyrshan radbah ia ka NPP kaba synshar ia ka Jylla.

“Kin mih shibun ki jingkynthoh ha ka por elekshon, hynrei hadien bala kut, ki paidbah kin sa iakren biang halor ka roi ka par, ka kamai kajuh bad ka jingkyrshan ba ki donkam” ula ong haba bynrap “Ka Party jong ngi ka don ia ka jingbun paid eh ha IIngdorbar Thaw Ain.

KA dei tang ka NPP kaba lah ban ai ia ka jingkyrshan ba phi donkam bad wanrah ia ka roi ka par kaba ngi dei hok ban ioh. Kumta, ka long kaba donkam ba ngin vote ia ka Sorkar kaba lah ban ai ia ka roi ka par”.

“Ngim dei ban iapyrkhat da kiwei pat ki lynti lait na kaba vote ia ka seng sain pyrthei kaba don ha ka liang synshar” ula ban jur.

Haba kren halor ka jingaiti jong ka NPP ban trei na ka bynta ka bha ka miat u paidbah, u Conrad ula ong “Bun kin iakam bad ai ki jingkular ha ka kam sain pyrthei, hynrei ngi don hangne ban shakri ia ki paidbah bad wanrah ia ka roi ka par. Kane ka dei kam jong ka synshar khadar. Balei ba ngin pynleit jingmut sha ki jingkynnoh ba khlem nongrim, haba, hadien ka elekshon, kito kiba kynnoh kin sa shu jah rngai ha ryngkat ki jingkular jong ki?.

Iapyrkhat lypa ia kaei ka ban jia hadien ka 24 tarik u Rymphang”.

Haba kren halor ka jingtih dewiong bala pynjari hapoh ka Jylla, une u Khliehduh ka NPP ula ong ba ka dei tang ka NPP kaba la leit tynruh ia ka hukum khang tih dewiong bad kala jop ruh ha kaba mynta kala ioh ia ka jingbit ban sdang noh ia ka jingtih dewiong kat kum ka jingstad saian.

“Ki Ophisar n aka Coal Ministry kila dei wan jurip ia ki par ha Ri-lum Jaintia bad shen kin sa wan jurip sa ia ki par ha West Khasi Hills ruh. Ngi la lah ban weng ia kawei na ki jingtynjuh kaba khraw bha bad ngi kyrmen ba kin sa wanrah ia ki jingkylla kiba bha” ula ong.

U la pynthikna ia ki nongtih par tynrai ba kin ym donkam shuh ban iaid lyngba ka jingmynjur kaba pyrkhing bha na ka bynta ban tih par. “Ki nongtih shyiap bad kiwei kiwei ki par kiba rit, kiba hapoh 10,000 sqft, ki la kyntu ban pyllait na ki kyndon kiba pyrkhing bha.

Kum ka sorkar ngi la leit iakren sha Delhi ban pyllait ia ki na ki kyndon kiba pyrkhing bha na ka bynta ki nongtih par kiba rit ba ria. Ngi thmu ban pynthikna ba ki nongtih par tynrai kin ym hap ban ïakynduh ïa kine ki jingeh”.

U la pynpaw ruh ïa ki jingthmu jong ka sorkar na ka bynta ban kyntiew ïa ki kam ialehkai, ka pule puthi, bad ki jingtei ha kylleng ka jylla. U la kdew ba ka jingtei ïa ka madan ïalehkai phutbol bad ka madan ïalehkai track-and-field ha Nongstoiñ ka ieng kum ka jingpynshisha ïa ka jingshimkhia jong ka NPP ïa ki paidbah.