Shillong, Rymphang 18 : U National General Secretary ka NPP bad Symbud Myntri Rangbah Bah Sniawbhalang Dhar ha ka sngi Ba-ar ula ong ba ka Voice of the People Party (VPP) kala pdiang lypa ia ka jingshah rem haba ka wanrah ia ki briew na kylleng ki constituency ban pynheh paid ha manla ki jingialang ialap elekshon haba sot nuksa ia ka jingialang ha Umladang.
U Bah Sniawbha ula kynthoh ia kane na ka rynsan ialap elekshon ha shnong Moobakhon ban pan jingkyrshan ia u CEM ka JHADC bad MDC ka Moodup-Umladang Bah Thombor Shiwat lem bad ia u kyrtong ka Moodymmai-Nongkroh Bah Jesse Suiam ha shnong Tyrchang.
Ha Moobakhon, u bah Sniawbha ula kyrpad ia ki paidbah ka Moodup-Umladang Constituency ba kin ai ka jingshaniah ha ka jinglong Nongialam u Bah Thombor Shiwat, uba dei u CEM bala shakri slem eh ha Ri-lum Jaintia.
Ula ong namar ba ka VPP ka tip ba u Bah Thombor un jop, kam don lynti pat da kumwei lait na ka jinglum ia ki briew na ki san constituency ban iashimbynta ha ka jingialang ha Umladang. “Kane ka pyni ba kala pdiang lypa ia ka jingshah rem. Kumta, nga kyrpad ia ki paidba ban pynthikna ba u Bah Thombor un ioh ia ka jingjop. Kito ki bym ju kyrshan ia nga mynta kila wan shakhmat bad ngi pdiang sngewbha ia ki” ong u Bah Sniawbha.
Haba pynpaw ba ka NPP ka dei ka party kaba kren duna bad trei kham bun, u Symbud Myntri Rangbah ula ong “Kiwei ki seng sain pyrthei ki lapmiet tang ka thok ka shukor bad kumta phim dei ban shah ialam bakla ha ki jingkular ba thylli jong ki”.
Ha shnong Tyrchang, u Bah Sniawbha ula ong ba ka NPP ka sngewskhem ba u Bah Suiam un jop na Moodymmai-Nongkroh constituency.
“Kiwei pat ki seng sain pyrthei kila kynthoh ia ngi namar ngi dei ka Sorkar kaba treikam. Ta ka daw baroh ki kwah ban kawang maw ia u diang uba don soh naba ki kwah ia ka Sorkar ban ai lem ia u soh. Hynrei, katba nang bun kiba kynthoh ia ngi katta ngi nang khlain nang khlain. U nombor jong ngi ula nang kiew bad mynta ka NPP kala don haduh 32 ngut ki MLA” ula ong.
“Nalor kata, kam ju don ka jingiashrut hapoh ka party namar ka dei ka party kaba pynleit jingmut ha ka jingskhem bad ka roi ka par jong ka Jylla na ka bynta ka bha ka miat u paidbah. Ngi la iaid ha kane ka lynti khnang ba ka Jylla kan kiew” ula ong bad bynrap “Ka VPP ha kawei ka liang, ka nongrim jong ka, ka long ban shu kren ym ban trei ia ka kam. U Bah Ardent ula leit iasoh bad bun tylli ki seng sain pyrthei. Hadien ka elekshon ngam tip sa kaei ka seng sain pyrthei ba un thaw. Ka NPP ka don ia ka thong ban wanrah ia ka roi ka par. Ngim khuslai la ngi duh thiah duh dem na ka bynta ka roi ka par jong ka Jylla bad ki constituency” ula bynrap.
