Shillong, Naitung 04 : Ka National People’s Party (NPP) kala pynkhreh shaid shaid ia ka jingiakhun kaba khlain ha ka elekshon Garo Hills Autonomous District Council (GHADC) bad kyrmen skhem ba kan ioh khur ia ka jingjop ba palat ia shiteng na ka jingdon ki MDC hapoh ka Iingdorbar (absolute majority).
“Ngi la pynkhreh ia ka jingiakhun kaba khlain ha ka elekshon GHADC bad ngi sngewskhem ba ngin ioh ia ka absolute majority” ong u Nongialam ka NPP bad Myntri Sorkar Rakkam A Sangma haba iakren bad ki nongthoh khubor.
U Rakkam ula pyntip ruh ba ka party kan mih iakhun marwei ia ka elekshon bad kan ym iatehlok satia bad kiwei pat ki seng sain pyrthei haba bynrap “Klet noh ia kiwei ki party ba iasngewthuh jingmut, klet noh ia ka jingwan iatreilang. Ka NPP kan trei shitom ban jop bun paid duh ha GHADC”.
“Ka Politics ka dei ka dei kaba pher bha bad ngi khmih lynti ia ki jingmih bapher bapher bad ki jingpynkhreh bapher bapher. Kam dei kaba suk iano iano ruh. Khlem pep ka NPP kum ka party, ngi la trei shaid shaid ia ka kam. Ngim khein sting satia ia ka kam” ula ong haba jubab ia ka jingkylli halor ka jingpynkhreh ki liang pyrshah ia ka elekshon.
U Rakkam ula pynpaw ba ka NPP kan pynleit jingmut ha kaban pynphriang ia ki khubor halor ki jingjop jong ka party ha ki kam bapher bapher. Ula ong ba ka Sorkar hapoh ka jingialam u Myntri Rangbah Conrad K Sangma kala lah ban wanrah ia ka jingkylli ha ka liang ka jingpyniasoh surok, ka koit ka khiah, ka pule dangle, ka kam ialehkai, ka rep ka riang bad kiwei kiwei.
“Hynrei, ki dang don shibun kiba hap ban pynjanai hynrei ngi la pyni sha ki paidbah ka Jylla bad ki paidbah ka Ri-lum Garo. Peit ia ki surok kiba itynnad, ki madan ialehkai, ki college ba bun, ki iingskul ba bun. Ngi la pynkha ia baroh ki lain pule ha baroh ki skul Sorkar. Ngi la kyntiew kyrdan bad ai ia ki building ba bha ia ki college. Ai ba ki paidbah kin bishar ia ka jingtreikam jong kane ka Sorkar” ula ong haba kyntu ia ki nongthep vote ba kin bishar ia ka jingtreikam ka Sorkar.
Haba kylli, u Rakkam ula iathuh ba palat spah ngut ki kyrtong kila pynpaw ia ka jingkwah ban iakhun na ka NPP bad ki don ruh bun ngut kiba iaknieh ia ka ticket na ki katto katne ki constituency.
 kala pynkhreh shaid shaid ia ka jingiakhun kaba khlain ha ka elekshon Garo Hills Autonomous District Council (GHADC) bad kyrmen skhem ba kan ioh khur ia ka jingjop ba palat ia shiteng na ka jingdon ki MDC hapoh ka Iingdorbar (absolute majority).){kind=link}