Elekshon GHADC | Hiar ka lyer ka Congress ha Garo Hills hadien ka elekshon Bihar, ong u Heh ka NPP

Shillong, Naiwieng 17: U Working President ka National People’s Party (NPP) bad Myntri Sorkar Marcuise N Marak, ula pynpaw ia ka jingskhem jingmut ba ka jingleh bha ka seng NPP ha ki kam pynroi hapoh ka jingialam u Conrad K Sangma kum u Myntri Rangbah ka Jylla, kan pynlong ia ki paidbah ban ai jingkyrshan pura ia ka NPP ha ka elekshon Garo Hills Autonomous District Council (GHADC) khamtam eh hadien ba ka seng Congress kala nang hiar bha ha ka elekshon kaba dang shu dep ha Bihar.

“Ngan ym ong ba ngin jop da kaba suk namar ba ha man la ki elekshon ki don ia la ki jingmad ki bapher bapher. Hynrei ka lyer jong ka Congress kala hiar bha kumba ki pyrshang ban wanrah ia ka lyer, haba kila hiar bha ha ka elekshon ha Bihar. Kumta donkam ban iohi ia ka lyer kaba kumno kan don ha ka elekshon jong ka District Council. Ngi don ia ka jingkyrmen ban ioh ia ka jingkyrshan na ki paitbah ka rilum Garo namar ba ka sorkar jylla kala leh bha hapoh ka jingialam u Conrad K Sangma bad ka seng kaba bun paid kadei hi ka seng NPP” ula ong.

Ula banjur ia ka jingdonkam ban don ia ka jingkylla bad ia ka jingskhem jong ka GHADC bad kyntu ia ki nongthep vote ban kyrshan ia ka NPP kaba don ia ka jingiohi jngai ban wanrah ia ka jingkylla ha ka District Council.

“Ngi lah dep ban pynbeit ia ki mat jongka District Council. Kumta ngi kyrmen skhem ba katba ka District Council ka dang iaid mynta ha ka lynti jong ka jingkylla bad kane kala sdang. Mynta ha GHADC, ngi donkam ia ka jingkylla bad ki paitbah ha rilum Garo ruh ki donkam ia katei ka jingkylla. Kumta ka lah ban urlong tang lada ai ia u lakam synshar ia ka NPP, khnang ba kan lah ban pynthikna ia ki paitbah ka rilum Garo ba ngin lah ban ai ia ka jingskhem ha ka synshar khaddar bad ka mishon kaba don ia ka jingiohi jngai ban pynkylla ia ka District Council ha Garo Hills”

U Marak ula ong “Nga kubur ba ka don ka jingbym hun ki paitbah ia ki nongmihkhmat kiba mynta ha ka District Council hynrei ka sorkar kala leh ia kiba bun kiei kiei na ka bynta ka District Council. Kumba phi tip, ki mat kiba la ktah ia ka rukom treikam jong ka District Council la lah dep ban pynbeit noh dang shen, ha kaba u Myntri Rangbah ula pynbna bad thaw ruh ia ki committee bad sub-committee bad lyngba ka jongki, baroh kiei kiei la dep ban pynbeit noh bad mynta ka rukom treikam jong ka District Council kala bteng bad ka jingsiew ia ka tulop ruh kala sdang”.

U Marak ula ong, ba ym pat shim ia kano kano ka rai, la ka seng kan iatreilang bad kino kino ki seng saiñ pyrthei ban iakhun ia ka elekshon MDC ka GHADC kaban wan.
“Haduh mynta, ngim pat rai eiei kumno ban leh ia katei. Kan shong eh ha ka seng, la ngin iaid marwei ne iatreilang bad ki paralok bad ia kane ka rai yn sa shim kham hadien” ula ong.

Ula pynpaw ruh ba ka samoi treikam jong kane ka District Council kan kut noh ha u Iaiong 2026 bad ula pynpaw ba la kumno kumno ruh ia ka Tarik ban pynlong ia ka elekshon lah ban pynbna ha u bnai Rymphang 2026.

U Marak ula pyntip shuh shuh ba ka seng ka dang iaid shakhmat ban jied ia ki kyrtong na ka bynta ka elekshon GHADC kaban wan bad ka jingialap ia ka elekshon ruh kan sa sdang noh.

Ula ong, ba ka seng kala pynmih ia ka jingpynbna paidbah ka banyngkong kala buh Tarik ba ka 14 tarik u Naiwieng kan dei ka sngi kaba kut ban phah aplikeshon ki kyrtong, hynrei namar ba la bun palat ki jingkyrpad kumta la rai ban pynjlan ia kane haduh ka 30 tarik u Naiwieng.

Tang hadien bala dep katei ka jingthep kyrteng, ka seng kan sa lah ban pynkhreh ia ka thup kyrteng jong ki kyrtong kiba aplai ban ioh ia ka tiket na ka seng bad hadien kane yn sa pynbud sa ia ki jingialang kiba bun, kiban kynthup ia ki district bad ki block committee bad ka jingiasyllok lang ruh bad ki MLA.

Ka thup kyrteng kaba pura yn sa phah sha ka State Committee bad sha ka National Committee ban ioh ia ka jingmynjur, da ka jingthmu ban pyndep ia kane ka kam baroh hapoh ka taiew ka baar jong u bnai Nohprah” ula ong shuh shuh.