Shillong, Risaw 25 : Katba leit ha sor Shillong phin iohi ba ki lynti iaid kjat (footpath) kila dap da ki dukan shong madan bad ki nongiaid nongieng kila hap iaknieh jaka ban iaid na ki surok iaid kali, kaba lam sha ka jingkhapngiah ki surok bad jingdheng kali hynrei kaba kham ktah shuh shuh ka dei ka jingnang kharoi ki nongshong dukan madan na ka sngi sha ka sngi.
Ki lynti iaid kjat ki dei kiba la shna ban iaid ki paidbah bad nongiaid nongieng ba manla ka sngi. Hynrei, ki lynti iaid kat ha kylleng ka sor Shillong khamtam ha Laitumkhrah (na Police Point sha Beat House) ki dei kiba khapngiah tam da ka jing mih ki dukan madan naduh ka por mynstep haduh da miet, kiba die ia ki jain, ki soh, ki jhur bad kiwei kiwei ki mar.
Kane kala pynthut bha ia ki nongleit nongwan kiba la hap iaid bunsien na surok haduh ba ki kali kila hap ban kiar bad lam ruh sha ka jingdheng kali.
U Rangbah Shnong ka Laitumkhrah Bah Andrew A Jyrwa, ula iathuh ba ka Dorbar Shnong kan pyrrkhing noh ia ka jingwan kyntur ki nongshongdukan madan ha ki surok hapoh u pud u sam hadien ba ka Sorkar kala pyntreikam ia ka Meghalaya Street Vendors (Protection of Livelihood and Regulation of Street Vending) Scheme 2023.
U Bah Andrew ula ban jur ba ka ingkyntur jong ki nongshongdukan madan ka dei ka bym lah tehlakam satia ha ki lynti iaid kjat naduh Laitumkhrah shaduh sha Fire Brigade.
Ula batai ba naduh mynstep, ki nongshongdukan madan kila sei iala ki mar ki mat ha ki lynti iaid kjat bad buh jingeh ia ki paidbah kiba leit ba wan man ka sngi. Ki nongiaid nongieng kila shem jingeh ban iaid na ki lynti iaid kjat bad la pynbor ia ki ban iaid na ki surok, kaba la nang pynkhapngiah shuh shuh ia ka surok.
Ka Laitumkhrah ka dei kawei ka jaka ba hui hui bha manla ka sngi namar ka jingdon jong ki skul, ki college, ki ophis Sorkar, ki ophis jong ki kompani shimet bad kiwei kiwei.
U Bah Andrew ula pyntip ba ka Dorbar Shnong kan buddien bha ia ka plan jong ka Sorkar haba iadei bad ka kam shong dukan madan, ka ban sa ai da ka jaka ba kyrpang ia ki ba kin buh dukan, ym shuh ba kin shu shong dukan ha kat ki jaka kiba lait.
Ha ki snem bala leit noh, ka Dorbar Shnong Laitumkhreh kala pynlong ia ka jinglum kyrteng ia ki nongshongdukan madan hapoh u pud u sam jong ka. Napdeng ki spah ngut kiba la pynrung kyrteng, 90% ki dei ki briew ba nabar bad tang khyndiat eh ki dei ki nongshongshnong ka Laitumkhrah, ula pyntip.
Ula ong ba lada ka Sorkar Jylla ka bthah ia ka Dorbar Shnong ban lum kyrteng biang ia baroh ki nongshongshnong dukan madan, ka Dorbar Shnong ka kloi ban iatreilang bad ka Sorkar halor kane ka kam.
Watla ka dei ka ‘non vending area’ (bym shah shong dukan madan), ka Dorbar Shnong Laitumkhrah ka dei kaba nyngkong tam na ki Dorbar Shnong ban lum kyrteng ban ithuh ia baroh ki nongshongdukan madan.
U Bah Andrew u pyntip ba ka Dorbar Shnong Laitumkhrah kala dep ithuh ia ka jaka (ha Veronica Lane) ban ai jaka shong dukan madan ia ki briew ba kin nym kyntur shuh sha ki lynti iaid kjat.
