Shilllong, Naitung 29 : Ka kynhun ialehkai ka Shillong Lajong FC bad ka Rangdajied FC kin iatyngkhuh mar pyrshah ha ka jingialehkai Shillong Derby, ka ban long mynta ka sngi Ba-ar ha JN Complex jong ka 134th Indian Oil Durand Cup.
Kane ka jingialehkai Shillong Derby kan sdang ha ka por 7 baje janmiet.
Ka Shillong Lajong kala sdang ia kane ka lympung ialehkai da ka jingjop ba don burom pyrshah ia ka Malaysian Armed Force, kaba long da 6-0 kol.
Ka Shillong Lajong, kaba la rung sha ka semi final da ka jingjop ia ka Rangdajied FC ha u snem bala lah da 2-0 kol, kiba la wan lyngba u captain Kenstar Kharshong bad Ronney Wilson, kiba la leit ialehkai mynta na FC Goa.
Kane Shillong Lajong kala shah rem noh ha ka NorthEast United FC kaba la ioh ban bat ia ka nam lahduh jong kane ka lympung ha u snem bala lah.
Ka Shillong Lajong ka kyrmen ban iai bteng ia ka jinglah ialehkai bha pyrshah ia ka Rangdajied FC. “Man ki jingialehkai ki long kiba kongsan bad ka jingialehkai kaba hap ban jop ia ngi. Ka Rangdajied ka dei ka kynhun kaba khlain bad kaba bun ki rang ialehkai kiba dang samla bad ba don ka dap, kumba long ka kynhun jong ngi hi. Nga ngeit ba kan dei ka jingiakhun ka ban itynnad bha. Ka jingjop kan nang pynjan ia ngi sha ka jingialehkai knockout” ong u Birendra Thapa, Head Coach ka Shillong Lajong.
Ha kawei ka liang, ka Rangdajied FC kaba pyndep ha ka kyrdan kaba lai ha ka Shillong Premier League (SPL) ka kyrmen skhem ka kan lah ialehkai kham bha pyrshah ia ka Shillong Lajong. Ka Rangdajied kala shah rem baroh arsien ha ka jingialehkai SPB pyrshah ia ka Shillong Lajong bad kyrmen ba kin lah ialehkai bha ha ka Durand Cup.
Haba kren shuwa ka jingialehkai, u Head Coach ka Rangdajied FC Aibanjop Shadap ula ong “Ka jingialehkai Derby hi ka dei kaba kyrpang, kam pher la phi don ha kano kano ka bynta jong ka pyrthei. Ngin ai ia ka jingialehkai kaba bha tam ha madan bad ban pynsngew sarong ia ki nongkyrshan jong ki da ka jingjop. Hynrei ngi tip ba ka dei ka jingiakhun kaba eh. Ka Lajong ka dei ka kynhun kaba khlain bad kaba la ialehkai ha ka I-Leaque bad ki kam biang ban ia ngi ha kiba bun ki bynta”.
