Kolkata, Nailar 23: Ka NorthEast United FC kala thaw ia ka histori da kaba jop biang ha ka sien ka ba-ar ia ka Durand Cup da kaba pynliem da 6-1 ia ka Diamond Harbour FC ha ka jingiakhun ia ka final kaba la long ha Vivekananda Yuba Bharati Krirangan (VYBK) (Salt Lake Stadium) hynne ka sngi Saitjain.
Kane ka jingjop suk, kala pynlong ia ka NorthEast United ban rah haduh arsien kata ha u snem 2024 bad 2025, hadien jong ka East Bengal kaba la rah laisien linter ha u snem 1989, 1990 bad 1991 ia ka nam lahduh jong ka Durand Cup bad ka NorthEast kala jop ia kane hapoh ka jingialam jong u Coach u Juan Pedro Benali.
Mar ia sdang ka jingiakhun ia ka Final, ka NorthEast United kala ioh thep 2 kol ha ka kylla step ha kaba u Asheer Akhtar ula thep ha ka minit kaba 30 bad u Parthib Gogoi ula thep ha ka minit kaba 45+1.
Ha ka kylla miet ka NorthEast United kala bteng ban ialehkai bha bad kala ioh thep sa 4 kol kaba la pynjem khnap ia ka Diamond Harbour.
U Thoi Singh ula thep kol ha ka 50 minit, u Jairo Samperio ula thep kol ha ka 81 minit bad u Andy Rodriguez ula thep ha ka 85 minit bad u Alaaeddine Ajaraie uba la ioh thep bun kol tam ha kane ka lympung ialehkai football ula ioh the pia ka kol ha ka minit kaba 90+3 lyngba ka Penalty.
U Ajaraie, ula ioh thep 8 kol ha kane ka lympung iakob ialehkai jong ka Durand Cup.
Katba ka Diamond Harbour kala ioh thep tang shi kol ha ka 68 minit lyngba u Luka Majcen hynrei hadien kane, kam shym la iohlad shuh ban thep kol eiei.
U Gurmeet Singh jongka NorthEast United FC ula ioh ia ka khusnam Golden Glove ha ka sien ka baar, katba u Alaaeddine Ajaraie ula ioh ia ka khusnam Golden Ball ne kum u Nongialehkai uba kynsai tam bad ula ioh ruh ia ka Golden Boot halor kaj ingioh ban thep bun kol.
 (Salt Lake Stadium) hynne ka sngi Saitjain.){kind=link}