Shillong, Naitung 29 : Ka Shillong Lajong FC kala pynbteng ia ka jingjop ha ka jingiaid lynti ha ka 134th Indian Oil Durand Cup 2025, da ka jingpynliem ia ka Rangdajied FC da 3-1 kol ha ka jingiakhun jong ka Shillong Derby ha ka janmiet sngi Ba-ar.
Ka madan JN Complex kala dap da ki nongkyrshan kiba phong ia ki jersey rong saw bad rong blue ban ai mynsiem iala ki jong ki kynhun ialehkai ha kane ka jingiakhun.
Ka Shillong Lajong kaba la sdang ia ka jingialehkai ha kane ka lympung da ka jop ba 6-0 kol ia ka Malaysia Armed Force FT myn ha ka 26 tarik Naitung, kala ioh biang ia ka jingjop kaba donkam bha hakhmat jong ki paid riewieid phutbol ha JN Stadium.
Ka jingiakhun hapdeng kine ki radbah ialehkai phutbol ka Shillong, ka long kaba iakhaid bha naduh kaba sdang hynrei dei ha ka minit kaba 45+1, u rang ialehkai Everbrightson Sana Mylliempdah jong ka Shillong Lajong, ula ioh ban thep ia ka kol kaba nyngkong hashuwa ban kut artad ka por jong ka kylla step.
Ka Rangdajied FC ka khlem pyndem niuhmat satia ialade bad kala iakhun dohiap ban pynphai ia kane ka kol. Dei ha ka minit kaba 59 ba ka kynhun kala ioh ban pynphai ia ka kol bad pyniakhaid ia ka jingiakhun lyngba ka kol u Mebanshngain Kurkalang.
Tang hadien 7 minit ba shah thep kol, ka Shillong Lajong kala iakhun dukhi bad kala ioh ban tam biang shakhmat da ka jingioh thep kol ha ka minit kaba 66, kaba la wan lyngba u substitute Damaitphang Lyngdoh bad la pynbud sa ka kol u Gladdy Nelsen Kharbuli kaba la wan ha ka minit kaba 80, kaba la pynskhem syndon ia ka jingjop.
