Shillong Nailar 21: Ka kynhun ialehkai ka jylla, ka Shillong Lajong FC kala pynkyndit ia ka East Bengal da kaba pynrem da 2-1 kol bad pynthikna syndon ia ka jaka ha ka Semi Final jongka jingiakob ialehkai Football Durand Cup ba 133, kaba long hynne ka sngi Balang, hakhmat jongki 14988 ngut ki nongkyrshan ha Jawaharlal Nehru Stadium, Shillong.
U Marcos Rudwere Silva bad u Figo Syndai kila ioh ban thep ia ka kol jong ka Shillong Lajong katba u Nandhakumar Sekar ula thep ia ka kol na ka bynta ka East Bengal.
U Manager ka East Bengal u Carles Cuadrat ula pynmih da ki nongialehkai kiba tbit kiba kynthup ia u Dimitrios Diamantakos, Madih Talal bad u David Lalhlasanga, kiba ialam nakhmat ia ka kynhun katba u Saul Crespo bad u Jeakson Singh kila ialehkai ha ka Midfield.
Ka kynhun na ka jylla kala pynkyndit ia ka kynhun radbah na Kolkata ha ka minit kaba 8 ha kaba u Marcos Rudwere Silva ula ioh ban thep ia ka kol kaba nyngkong, kaba la shut da u Hardy Cliff Nongbri lyngba ka Corner Kick.
Ka East Bengal kala pynkhlain ban tur shakhmat ban ioh thep kol hynrei haba kala ioh ia bun tylli ki kabu, kam shym la lah pat ban thep ia ka kol ban pyniakhaid bad kane ka dei ruh na ka jingiada borbah jong u nongapkol u Manas Dubey bad ki nongialehkai shadien jong ka Lajong ki bym shim la ailad ia ka bol ba kan ioh rung shapoh kol.
Ha ka kylla miet, baroh ar tylli ki kynhun kila pyrshang ban ioh thep kol da ka jingpyrshang ban shut ia ka bol na jngai, hynrei ha ka minit kaba 77 ka East Bengal kala ioh ban pyniakhaid da ka kol u Nandhakumar Sekar.
Ka East Bengal kala bteng ban tur shakhmat ban ioh thep kol ban iohrah ia ka nam jop hynrei kala plie lad pat ia ka Lajong ban tur kylla shakhmat, ha kaba u Figo Syndai ula ioh ban thep ia ka kol hashwa ban kut noh ka jingiakhun kaba la pynthikna syndon iaka Lajong ban ioh khur ia ka jingjop.
Lyngba kane ka jingjop, ka Shillong Lajong kala lah ban pynliem ia artylli ki kynhun ialehkai jong ka Indian Super League (ISL) kaba kynthup ia ka Goa FC bad ia ka East Bengal.
