Shillong, Jylliew 09 : Ka seng Federation of Khasi Jaintia & Garo People (FKJGP) kala duhnoh ia uwei na ki Nongseng bad u Nongaibuit aibor da ka jingkhlad kyndit jong u Bah Sounder Strong Cajee, President ba nyngkong eh ka seng.
Ka FKJGP kala phah ia ka kyrwoh sngewlem sha ki bahaiing hasem jong une u Nongialam barim bad pynpaw ia ka jing sngewsih bad ka jingduhnong kaba khraw ia ka Seng kaba la iaid lynti ban shakri ia ka Jaidbynriew naduh u snem 1989.
“Ka jing khlad kyndit noh jong u Bah Sounder Strong Cajee, kala pynnoh mynsiem shi katdei eh iaka seng namar u bah Sounder um dei satia tang u nongseng bad nongialam barim hynrei udei u Nongai buit, u riew shemphang, u khraw pyrkhat, u nongialam u bym ju pyndem, u nongialam uba dap da ka mynsiem ba shynrang, u nongialam u bym kylla jutang, u nongialam uba skhem ka nongrim bad u paia khnong uba la noh synñiang shikatdei eh ia ka jaitbynriew bad ia ka jylla hi baroh kawei” ong ka kyrwoh sngewlem bala phah da u President ka FKJGP Bah Dundee C Khongsit sha ki Khun u Bah Sounder.
U Bah Dundee ula ong ba ia ka FKJGP la sdang da ka sain pyrkhat ba rangbah jong u Bah Sounder bad lyngba ka jingtrei borbah met bad mynsiem, ka seng kala suhthied sha baroh ki bynta jong ka Jylla da ka jingthrang bad jingangnud b aka FKJGP kan dei ka seng ka bym iashah shiliang ia u duk-u duk-u rit-u ria hynrei kaba ieng na ka bynta ka ‘mon-lang, ka bha-lang bad ka myntoi-lang.
“Ka FKJGP ka tip bad Sngewthuh shai ba ka jingkhlad noh jong utei u Riew Rangbah uba long uwei na ki Paia Khnong, ka long ruh ia jingduh kaba khraw ym tang ia ka iing ka sem hynrei ia ka seng, ia ka jaitbynriew bad ia ka Jylla hi baroh kawei” ula ong.
“LEIT SUK BAD SHONG SUK HA DWAR U BLEI BAH SOUNDER STRONG CAJEE & TO NANG KYRKHU IANGI NAJRONG SHA TBIAN” pynkut ka kyrwoh.
