Shillong, Risaw 06: Ka Sorkar Jylla kala duh ei ia ka khajna ba kot sha ka T. 57.83 klur na ka kyaid namar ka jingbym lah jong ka Tnad Excise ban pynmih ia ki kyndon ba iadei bad ka jingpynmih ia ka Indian Made Foreign Liquor (IMFL) naka Entra Neutral Alcahol (ENA).
Ka jingleh audit kala shem ba ka sorkar Jylla kam pat lah satia ban pynkhreh ia ka techninal manual la ka jong bad ka kyndon bala buh ban pynmih ia ka kyiad IMFL bad ENA tad haduh u Jylliew 2020, ong ka Comptroller and Auditor General of India (CAG) ha ka kaiphod halor ka kam lum khajna jong u snem ba kut ha ka 31 tarik Lber, 2020.
“Namar ka jingbym lah jong ka Sorkar Jylla ban pynmih ia ki kyndon ban pynmih ia ka IMFL na ka ENA, wat hapdeng ki jingduna kiba la kdew ha ka kaiphod audit jong u snem ba kut ha ka 31 tarik Lber, 2014, kala lam sha ka jingpynmih duna ia ka kyiad ba 3,78,946 case, kaba kynthup ia ka jingduh khajna ba kot sha ka T.57.83 klur ha ka dur jong ka excise duty (T. 30.69 klur) bad ka VAT (T.27.13 klur) ha kine ki san snem bala bishar ia ki kot ki sla” kala ong.
“Namar kata, ka jingbym lah jong ka Sorkar ban pynmih ia ki kyndon ba iadei bad ka jingpynmih ia ka IMFL naka ENA bad ka kyndon ban pynmih ia ka ENA na u khaw, kala lam sha ka jingduh khajna ba kot T. 57.83 klur” kala bynrap.
Ka kaiphod kala pynpaw ruh ba kam lah satia ban pynthikna lehse ka lah ban don ka jingbuhrieh ia ka jingkhein ba iadei bad ka jingpynmih bad jingdie ia ka kyiad IMFL ha ka Jylla.
Ia kane ka kam lah dep ban pyntip sha ka Sorkar Jylla ha u Naiwieng 2021. Ha ka jingialang ba long ha u bnai Rymphang mynta u snem, u Commissioner & Secretary ba khmih ia ka Tnad Excise ula ai ka jingkular ba ka Tnad kan sa pynmih noh ha u bnai Jymmang 2022 ia ka kyndon halor ka jingpynmih ia ka IMFL naka ENA bad ka jingpynmih ia ka ENA na u Khaw .
Ka kaiphod ka pyntip ba ha u snem 2014, ka jingduhnong jong ka Jylla na ka khajna ha ka dur jong ka Excise duty bad VAT namar ka jingbym don kine ki kyndon kala kot sha ka T. 10.15 klur.
Ha Meghalaya, ka don ka distillery, kawei ka brewery bad san tylli ki bottling plant. Nalor kata, ki don ruh haduh 40 tylli ki bonded warehouse kiba la ioh licence ban wanrah ia ka kyiad na shabar ka Ri ba kan sam bad die hapoh ka Jylla.
Na ki kot ki sla jong kawei ka distillery bad ki san tylli ki bottling plant kaba dei jong u snem naduh 2015-16 haduh 2019-2020, ban peit ia ka jinglum excise duty kaba dei kat kum ka hok, ia kaba la pynshong nongrim ruh na ki jingkhein ba iadei bad ka jingpynmih kyaid bad ka stock, kala paw ba na ki san tylli ki bottling plant ha Jylla, saw tylli kila pyndonkam haduh 3,58,34,527.60 BL ka ENA hapdeng u snem 2015-16 haduh 2019-20.
Haba shim jingkhein ia 1% ka wastage norm (0.5% blending bad 0.5% racking), kine ki bottling plant la khmih lynti ba kin pynmih haduh 90,96,457.00 case ka IMFL.
Hynrei, san tylli ki bottling plant kila pyni ia ka jingpynmih tang 87,17,511 case ka IMFL kaba lam sha ka jingpynmih duna ia ka IMFL da 3,78,946.00 case.
Ka Audit kala shem ruh ba kine ki bottling plant kim shym la lah ban buh jingkhein ia ka jingthied ia ka ENA bad jingpyndonkam, lane don kano kano ka kaiphod bala phah sha ka Tnad Excise.
