Nongstoiñ, Nailar 8: Ha u bnai jymmang ba la dep ki nongrep sying ki la phuhmut phuhmat bha, namar ka їew ka hat ka la sdang ban thnem ha kaba ki nongkhaїi sying ki la thied ha ka dor lai haduh saw hajar shi mon, hynrei ha kaba kut jong u bnai, ka dor їew dor hat ka la hiar kynsan sha ka ar hajar bad u sying ba bha duh, u poi tang arhajar arspah shi mon.
U bah R.Thongni na ka shnong Umtap haba їakren bad u nongthoh khubor, u la ong ba u sying u dei u mar rep ba kongsan tam jong ki paitbah nongshong shnong ka thaiñ. Hynrei suki suki pat kila sdang ban kynran dien noh namar ym dei tang ba ka dor їew dor hat ka kylla man ka por, man u bnai ne man ka snem, hynrei kaba kham pynduh jingkyrmen ka dei ka jing jur palat ka jingїap khlam.
U la ong ruh ba shisien ba la don katto katne tylli ki jyntang kiba sdang ban kylla stem, suki suki bad ki don ki jaka ba haduh ban da dei ka por ban khlong u sying ha ka lyngha rep u їap lut baroh.
U bah Thongni u la ong ruh ba kaba lyngngoh ka long ba katba nang mih ka jingpynmih sying ki nongrep na katei ka thaiñ ka nang duna. Namar ha ki snem ba mynshuwa lada thung shispah kilo, ha ka por ba khlong dang lah ban їoh san hynriew haduh phra spah kilo. Hynrei ha kine ki snem wat lada u jyntang u bha katno katno ruh lada thung shispah kilo ha ka por ba khlong lada їoh bun eh ruh tang saw haduh san spah kilo.
Ha ki snem ba la dep ki nongrep ki ju pynїaid bha їa u sying sha їew Hahim da kaba pynkit da ki kulai, hynrei naduh ba la poi surok haduh Langpih ki nongkhaїi sying ki la wan thied na poh shnong. Don ruh kiba leit buh ha kit stock ha Nongstoiñ, hynrei ha kine ki sngi ki surok ki kynjah jar jar namar ba ki nongkhaїi ba buh stock ha Nongstoiñ, ki ong ba ka duna palat ka jingdawa sying na ki Nongkhaїi kiba ju wan kit man ka por.
