Shillong Lber 20 : U Lat ka Jylla Phagu Chauhan hynne ka sngi Nyngkong, ula ong ba ka jinglong jingman ka suk ka sain ha Jylla kala shongsuk haba iaiban ba ka Sorkar kala kut jingmut ban pynbeit noh ia ka jingiakajia pud sa ha ki 6 tylli ki jaka ba dang sah bad ka Assam.
Haba ai jingkren ha ka sngi sdang jong ka Dorbar Mang tyngka, u Chauhan ula ong ba ka jingshngain jong ki Nongshong shnong, ka jingsuk bad ka jingai jingiada ka long kaba kongsan bha na ka bynta ka roi ka par jong ka Jylla.
Ula pyntip ba ka sorkar Jylla kala thung ia ka Judicial Commission ban tohkit halor ka jingjia ha Mukroh bad kala kut jingmut ban pynthikna ia ka jingbishar ba hok ia ki lanot bad ka iing ka sem jong ki.
“Ban pynthikna ia ka jingiada iala ki jong ki nongshongshnong ha ki shnong khappud, ka Sorkar kala pynbna (notify) haduh hynniew tylli ki border outpost” ula ong.
U Lat ula kdew ruh ia ka rai jong ka Hynniewtrep National Liberation Council (HNLC) ban iakren khlem the kyndon hapoh u pud u sam jong ka Riti Synshar ka Ri.
Haba pynpaw ba ka jingiakren iasuk kala sdang, ula ong “Ka Sorkar Jylla kala kut jingmut ban pynthikna ba ka jingiakren kan poi sha kaba kut kham kloi kat kaba lah. Ngi pynpaw ka jingsngewnguh ruh ia ka Sorkar India halor ka jingai jingkyrshan ia kane”.
U Chauhan ula ong ruh ba kawei na ki matti ba paw jong kane ka Sorkar ka long halor ka sienjam ba kala shim ban pynbeit noh shirta ia ka jingiakajia pud hapdeng ka Meghalaya bad ka Assam.
Hadien bun ki jingialang, baroh artylli ki Jylla kila shim ban iakren pynbeit shuwa ia hynriew tylli na ki 12 tylli ki jaka ba iakajia kata ka Tarabari, Gizang, Hahim, Boklapara, Khanapara-Pillangkata bad Ratacherra.
Ki Regional Committee bala khlieh da ki Myntri Sorkar na baroh artylli ki Jylla, kila leit ban jurip sha kine ki jaka kajia, pynlong ia ki jingialang paidbah bad iasyllok bad ki kynhun bapher bapher na ka bynta kine ki hynriew tylli ki jaka.
Da kaba pynshong nongrim ia ki kaiphod jong baroh lai tylli ki Regional Committee, ka Sorkar Meghalaya bad ka Assam kila iasoi ia ka MoU ha ka jingiadon ryngkat u Myntri kam Pohiing ka Ri.
“Nga da sngewkmen eh ban pyntip ha kane ka Iingdorbar ba ka Sorkar Jylla kala kut jingmut ban pynbeit noh sa ia ki hynriew tylli ki jaka iakajia ba dang sah. Kane ka long kaba kongsan ban pynthikna ba ki nongshongshnong ha ki jaka khappud kin nym shah khanglad ban ioh ia ka jingsuk bad ka roi ka par” ula ong.
Nalor ban pynneh ia ka shongsuk shongsain, u Lat ula ong ba ka Tnad Meghalaya Police kala pynleit jingmut bha halor ka jingpynjanai ia ka rukom tohkit ia ki jingjia baroh.
“Kane kala lam sha ka jingkiew ka jingchargesheet haduh 39.76% ha u snem 2022 haba ianujor ia ka 32.2% ha u snem 2021” ula ong.
Haba pynpaw ruh ba ka Tnad Pulit kala iakhun tyngeh pyrshah ia u droks, u Lat ula ong ba ka jingioh kurup drok kala kiew bha ha u 2022 kaba kot haduh T. 71 klur lem bad ka pisa ba kot T. 60 lak.
Ula ong ba ka Sorkar Jylla kala kut jingmut ban pynkhlain shuh shuh ia ka Tnad Pulit bad ban pynbiang ia ki jingdonkam jong kane ka tnad.
Ha ki snem bala leit noh, ka Sorkar Jylla kala pynkha haduh 5 tylli ki Fire & Emergency Service Station, 9 tylli ki Police Outpost bad 5 tylli ki Polit Station ba thymmai.
