Iap noh ka jingkylli u Dr Mukul halor ka Political Appointment
Shillong, Rymphang 21 : Ka jingpep khah khah jong ki Nongthaw Ain ka Liang Pyrshah ha kane ka Dorbar Mang Tyngka ka Iingdorbar Thaw Ain kala pynmih ia ka jingsngew artatien ia ka jingshimkhia jong kine ki Nongialam paidbah kiba la shah jied ban pynsngew ia ka sur jong u paidbah hapoh ka Iingdorbar Thaw Ain.
Ha ka sngi ba saw jong ka Dorbar Mang tyngka, u Lamphang ka Iingdorbar Thaw Ain Thomas A Sangma, ula khein iap noh ia ka jingkylli bala buh (starred Question) jong u Myntri Rangbah barim bad MLA ka Songsak Dr Mukul Sangma namar ka jingpep jong u ban wan sha ka Dorbar.
U Dr Mukul u dei ban buh ia ka jingkylli hakhmat u Myntri Rangbah ka Jylla Conrad K Sangma haba iadei bad ka jingthungkam jong ka Sorkar ia ki Chairman/Co Chairman/Vice Chairman bad ter ter (political appointment) haduh kine ki sngi ba mynta.
Ha ka sngi kaba lai, u Lamphang ula khein iap ruh ia ka jingkylli ba dei ban buh da u MLA ka Voice of the People Party (VPP) ka North Shillong Bah Adilbert Nongrum namar ka jingpep ia ka Dorbar. U Bah Adilbert u khlem pep satia ha shilynter jong ka Dorbar hynrei ula mih noh napoh ka Iing hashuwa ban poi ka pali ba un wanrah ia ka jingkylli kaba ula buh.
Ka jingkylli kaba u dei ban buh da une u MLA ka VPP ka iadei bad ka jingkynnoh thombor ki Pulit ia u MLA ka VPP na Mawlai Bah Brightstarwell Marbaniang ha ka jingiakhih ba dang shen jong ka VPP, kaba pyrshah ia ka jingwengkam ia ki Ophisar ka Meghalaya Lokayukta.
Kaba thamula, ki MLA ka VPP kila ju buh jingkylli bha halor ka jingbuh duna palat ia ka por pynlong ia ka Dorbar, kaba la pynbor ia ki ban hap mih sha surok ban pynsngew ia ki ishu ba ki don hakhmat u paidbah.
Dang shen, ha ka jingialang ha Mawlai, u MLA ka VPP Bah Adilbert Nongrum ula pynpaw paidbah ia ka jingkwah jong u ban wanrah hapoh ka Iingdorbar ia ka jingjia kaba la jia ha u MLA ka Mawlai (ba kynnoh thombor ki Pulit). Hynrei, haba ka pali jong ka jingkylli kala wan ban iatai, une u MLA ula jied ban jah napoh ka Iingdorbar.
Kiba buh kila pynpaw ia ka jingsngewkhia halor ka jingiapait iapra jong ka Liang Pyrshah. Ha ka por ba u Bah Adilbert u wanrah ia ka Bill shimet ban pynkylla ia ka Meghalaya Lokayukta Act, jan shiteng na ki dkhot ka Liang Pyrshah bad arngut ki MLA ba rangbah ka VPP kynthup u President Bah Ardent M Basaiawmoit bad MLA ka Mawryngkneng Bah Heaving Stone Kharpran, kila jah napoh ka Iing.
U Nongialam ka Liang Pyrshah Bah Ronnie V Lyngdoh, hashuwa ban sdang ka Dorbar Mang tyngka, ula thoh shithi sha baroh ki Party kiba don ha ka Liang Pyrshah ba kin iatreilang ha ka Dorbar Mang Tyngka. Hynrei, ka VPP kala jied ban trei la ka jong bad kan iatreilang bad kiwei ki dkhot ka Liang Pyrshah tang ha ki katto katne ki ishu.
