Shillong, Jylliew 26 : U Executive Member ka Tnad Finance ka KHADC bah Seiborlang Warbah ha ka sngi Palei, ula kubur ba ka Executive Committee ba ialam da ka Voice of the People Party (VPP) kala iatakhuh ia shibun ki jingeh ha ka jingtreikam namar ka jingduna ka jingshemphang.
“Ka dei ka jingtynjuh kaba khraw ia ka EC ba thymmai namar ka jingduna ka jingshemphang. Hynrei da ka jingiashong pyrkhat kam lang, kala iarap ia ngi (ban leh eiei halor kine ki jingeh) bad kane ka pyni ba ka jingiatylli ka long ka bor” ong u bah Seibor haba jubab ia ka jingiatai halor ka mangtyngka ha ka sngi kut jong kaDorbar Lyiur.
Une u EM ula kular ruh ba ka Executive Committee kan pyrshang katba lah ban nang trei shitom khnang ba kan lah ban kynjoh ia ka thong.
Haba mynjur ia ka jingkyrpad halor ka jingdonkam ban pyndonkam bha ia ki nongkynti ka Council bad ban pynthikna ba kin ym long ki jingduhnong, u bah Seibor ula ong “Namar kata, haba pynkhreh ia ka mang tyngka, ngi la rai ban pynthikna ba kam dei ban don ka jingpynlut ba pynsyrwa kai ia ka pisa”.
Ula kdew ruh ba ha ki snem bala leit noh, kila don shibun ki Advisory Committee bala thung ba kin leh ia ki kam bapher bapher hynrei da ka jingthaw ia kum kine ki Committee ruh ka wan lang ruh ka jingpynlut kaba bun, kaba hap ban buria da ka Council.
“namar kata ka daw, ngi la rai ban pynduna ia ka jingdon ki EM ha ka EC khnang ban pynduna ia ka jingpynlut ki bym phoida. Ngi la pynduna ruh ia ka jingdon ki Advisory Committee” ula bynrap.
