Shillong, Rymphang 23 : U Symbud Myntri Rangbah ba khmih ia ka kam pohiing (Police) Bah Prestone Tynsong ha ka sngi Thohdieng ula ong ba ki kam khappud bad ka Bangladesh, khamtam ki kam bymman bala leh da ki nong Bangladesh, ka donkam ia ka jingiatreilang kaba khlain bad ka jingpyrshang na baroh arliang ki bor Sorkar kat kum ki soskular ki Ri ka pyrthei.
Haba jubab ia ka call attention motion bala wanrah da ka MLA ka NPP na Sutnga-Saipung Kong Santa Mary Shylla haba iadei bad ka jingshah pyniap uwei u rangbah ha ki suba nong Bangladesh ha Loomsoski, kaba hap ha Narpuh Elaka, u bah Prestone ula ong “..Watla katta, shibun ki sienjam la dep ban shim ban ai ka jingiada ia ki paidbah ha khappud hynrei namar ka jinglong laitlan ha khappud, khatam ha ki jaka bym pat ker sainar, ki kam bymman jong ki nong Bangladesh ka dei kaba la jia na ka por sha ka por”.
Ha ka 6 tarik Kyllalyngkot, uwei u rangbah Bah Chiang Dhar ba 55 snem, ula shah pyniap dusmon ha ki nong Bangladesh katba u dang lei tap ia ka bri kwai ha Balisara, Loomsoski.
“Wat hapdeng ki jingeh kiba mih namar ka jinghap bud ia ki kyndon ka pyrthei, ka Tnad Pulit kam shym la shongkli kti ha kaban ai pynioh ia ka jingbishar kaba hok ia ki lanot bad ki bahaiing bahasem jong ki” ong u Bah Prestone haba bynrap ba ki Pulit ha ki District ym tang ba ki pynsted ia ka jingtohkit ia ka case hynrei ha ryngkat ka jingiatreilang bad ki BSF kila pyn klain ia ka jingpahara ha khappud khnang ban pynthikna ia ka jingsuk bad jingshngain jong ki paidbah ba sah ha ki jaka khappud.
Nalor kane, u DyCM ula pyntip ba ka Tnad Pulit kala shim ruh ia bun ki sienjam ban pynkhlain ia ka jingshong shngain jong ki paidbah ba sah ha khappud ka Bangladesh bad kine ki kynthup ia ka jingbuh ia 13 tylli ki Police Station ha Mahendraganj, Ampati, Dalu, Baghmara, Rongara, Dawki, Pynursla, Shella, Mawsynram, Ranikor, Lumshnong, Gasuapara bad Nonghyllam kiba don marjan ka khappud Bangladesh bad ruh ia 19 tylli ki Anti-Infiltration units ha ki jaka khappud.
U ong ba ki Pulit kiba don ha ki jaka khappud bad ka Bangladesh ruh kila iatrei ryngkat ryngkat bad ki shipai BSF ha kaba ki ju pynlong ia ki jingiaid pahara lang manla ka por ban tehlakam ia ki kam bymman bad jingrung tuh.
U pyntip ba ki jaka khappud kila don ruh ia ki Village Defence Party (VDP) hapoh ka jingkhmih jong ki SDPO, OC bad IC ba kin iaid pahara hala ki shnong bad ban tehlakam ia ki kam bymman.
