Shillong, July 16: U Myntri ka Sorkar bad Nongmihkhmat na East Jaintia Hills Bah Kyrmen Shylla ula ban jur ba ka jingiakhun pyrshah ia u droks ha Jylla ka donkam ia ka jingshimkhia bad ka jingiatreilang kaba khlain bad ki shnong ki thaw.
Haba iakren bad ki nongpathai khubor, u Bah Shylla ula ong, “Ka jingeh na u droks kam dei tang ka jingkitkhlieh jong ka sorkar ne ki bor khmih ia ka ain, hynrei ka dei ka jingiakhun kaba donkam ia baroh lang- ki longiing longsem, ki nongialam shnong bad ki samla ba kin iasnohkti lang”.
Ula kubur ia ki jingeh ha kaban ithuh ia kiba pyndonkam ia u droks, khamtam eh hapoh ki longiing bad ula kyntu ia ki paidbah ba kim dei ban kyrngah ha kaban pan jingiarap ne ban ai ia ki jingpyntip ia katei ka kam. “Lada don mano mano hapoh ka longiing kiba shah ktah, ngi dei ban kyrshan ia ki ha ka jaka ban buhrieh. Ka jingsngap jar kan nang pynsniew ia ka tei ka jingeh” ula ong.
U Bah Shylla ula ong ba ka East Jaintia Hills, ka dei ka jaka rung jaka mih ki kali bad ki briew bad ka long ka jaka kaba shah ktah bha na u droks.
“Ngi don bun ki lynti ha ka leit ka wan, la ka long na kawei ka jylla sha kawei pat ne na kawei ka ri sha kawei pat, kane kala buh ha ka jingeh ban tehlakam ia kane ka kam.
Kumta ka jingkhmih bniah ia ki kali man la ka sngi, ka jingkhangdam ha ki jaka khappud ba laitlan bad ka rukom treikam kaba pyrkhing bha kadei kaba kongsan bha” ula ong.
U Myntri Sorkar ula iaroh ia ki kynhun trei mon sngewbha, ki nongialam Balang bad ia ki shnong ki thaw kiba la pynsngewthuh paidbah halor ki jingktah u droks hynrei ka long pat kaba donkam ban iai pynlong shuh shuh ia kum kine ki prokram. Ula ong ba donkam ban pyndon bynta shuh shuh ia ki samla lyngba ki kam ialehkai bad kiwei kiwei ki kam kiba tei khnang ban pynkiar ia ki ba kin lait na u droks.
Ha kaba iadei bad ka jingpeitngor, ula kyrshan ban pyndait ia ki kor CCTV Camera bad ban pyniar ia ka Shillong’s Integrated Command and Control System sha kiwei pat ki district.
“Ki kor Technoloji kidei ki atiar kiba lah ban wanrah ia ka jingkylla lada nang ban pyndonkam bha ia ki” ula ong bad ka kyntu ia ki nongshong shnong bad ia ki tnad sorkar ba kin iatreilang bad ula pynkut da kaba ong “Lada ngi ieng tylli lang kawei, kan ym don kano kano ka jingeh, ne wat u droks, kaba ngin ym lah ban pynliem ha ka jingiakhun”.
