Nongstoin, Jylliew 22 : Ka jingjur u slap ba khlem sangeh kala pynkdut mynta mar shiteng ia ka surok Nongstoin-Wahkaji ha ka thain Nongkynjang namar ka jingrong noh ka surok subway, kaba la shna ban pyndonkam shipor katba ka kompani Vozrozhdenie kaba na Russia, kam pat pyndep ia ka jingkieng jong ka surok Double Lane.
Kane ka surok ba shah rong ka dei ka surok Subway bala shna ban pyniaid kali shipor namar ka jingpyntrei ia ka surok double lane ka dang iaid shakhmat. Kane ka surok kaba twa ka dei kaba pyniaid n aka kynroh jong ka jingkieng kaba don hajan ka Sub Centre Nongkynjang.
Kane ka surok ka dei kaba pyniasoh ia kiba bun tylli ki shnong ka thain Lai Lyngdoh bad ia ka South West Khasi Hills bad ka dei ruh ka surok ba ju pyndonkam manla ka sngi da ki paidbah ka thain.
Ka seng Federation of Khasi Jaintia & Garo People (FKJGP)-Lai Lyngdoh Unit kala pynpaw ba kane ka jingdkut ka surok subway kala buh hapdeng ki jingeh kiba bun ia ki paidbah ka thain khamtam ha ka leit ka wan namar ka jingbym don lynti shuh.
Ka seng kala pynpaw ia ka jingsngewbynniaw kaba jur halor ka jingsuki palat jong ka kompani Vozrozhdenie ban pyntrei ia ka jingkieng ha kane ka thain ba twa ka surok subway.
Kat kum ka jingong u President Bah Nestor Nongkseh, kane ka kompani kala dei ban shna wut wut ia kane ka jingkieng ban lah pyndep tang hapoh u bnai Lber hynrei la kynnoh ba dei namar ka jingkhein sting palat kane ka kompani, mynta kala wanrah ia ka jingeh ia u paidbah ba leit ba wan man ka sngi.
Ula pyntip ba kane ka kompani kala dep ban thain narrot ia kane ka jingkieng mynta la palat shibnai hynrei kala shu ieh noh khlem da pyndep ban siang dewbilat.
Ka FKJGP ka dawa ia ka Tnad PWD ba ka dei ban shimkhia mardor halor kane ka jingdkut ka surok bad ban bthah ruh ia kane ka kompani na Russia ba kan pynshna mardor ia ka surok bala shah pynjulor ha ka umslap ban lait ki paidbah n aka jingsohsat.
Pule ruh: Ioh tam ki shipai Assam Rifles ia u bomb Mortar na Imphal East
