Shillong Naitung 25: Ki pulit ka jylla kila rai ban pynlong ia ka jingtohkit halor ka shithi dawa pisa ia kaba la kynnoh ba la sam da ka Hynniewtrep National Liberation Council (HNLC) sha ki nongkhaïï Khasi bad ki bar Jylla ha ka jylla.
Ka khubor jong ka jingdawa pisa ka HNLC kala mih ha ka por ba dang sdang ka jingiakren iasuk hapdeng kane ka kynhun kieng atiar bad ka sorkar pdeng lem bad sorkar jylla.
Ki pulit ka jylla kila ong ba ka HNLC ka dang dei hi ka kynhun kaba la shah niew be-aiñ bad ka jingai jingiarap ne jingai sngewbha kan pynlong ia ki nongai ban shah khring bad shah pynngat ha ki kyndon aiñ.
Ula maham ba kino kino kiba noh synniang sha ka HNLC, lada ngi ioh jingtip bad ngi ioh ia ki sabut ba kila noh synniang, yn shim ia ki sienjam ban pynshitom ia ki katkum ka aiñ.
U Deputy Inspector General of Police (Eastern Range) u Davis NR Marak ula ong, “Ngim pat lah ban ong eiei ha kane ka khyllipmat ba kane ka jingdawa pisa kadei kaba shisha ne kaba shu thok. Ngi dang pynlong ia ka jingtohkit bad shisien ba ngi la wad bniah bad tohkit bniah ngin sa lah ban lap iaka jingshisha”.
“Hynin ka sngi, uwei u briew (Synshar Khymdeit) kaba ka kyrteng ka jongu kala mih, ula kyntait ba ym shim la dei satia ma u bad ula leit mih ruh sha Police Headquarter. La kitei ki shithi dawa pisa kidei kiba la dawa shisha da ka HNLC ne kila don kiba la shim kabu iaka kyrteng jongka HNLC, ngin sa lap ia ka jingshisha hadien ba ngila dep ba ntohkit halor kane ka kam” la ong une u heh pulit.
Ula ong ba ki pulit kin sa tohkit ruh la u Bah Khymdeit u donkti ne ym shim la donkti lane don kiba la pyndonkam da ka kyrteng ka jongu ha kaban sam ia kitei ki shithi dawa pisa, kaba la saphriang bad paw ha ki khubor kiba la mih ha ki lad pathai khubor.
Ka HNLC ha ka sngi Nyngkong, kala kyntait iaka jingdonkti ha kaban dawa pisa na ki nongkhaii bad kala kyntu ruh ia ki pulit ba kin kem mardor ia ki briew kiba donkti ha kaban pyndonkam bakla iaka kyrteng jong ka seng khnang ba ka jingiakren iasuk kan long kaba iaid beit.
Une u heh pulit ula ong, ba ki pulit kila ioh jingtip ba ki nongkhaii kila iohpdiang ia ki shithi dawa pisa hynrei haduh mynta ym shim la don kino kino ruh kiban wan mih shakhmat ba nujor ejahar ne ban pyntip eiei ia ki pulit.
“Ki katto katne ki nongkhaii ki lah ban kam ba kila shah dawa pisa bad ioh iaka shithi dawa pisa, hynrei kim shym la wan pat sha ki pulit ban phla la kila ioh shisha iaka shithi dawa pisa bad ka jingbym wan shakhmat ka jongki, kumta ia mynta yn ym lah ban pynshitom ne ban leh da kaba tyngeh.” ong u Marak.
U DIG ula ong ba ka jingbyrngem byrsit ia kiba shah dawa pisa ban shah leh da kaba tyngeh lada ki pyntip ia ki pulit, kadei ka buit jong ki kynhun kieng atiar.
“Lada phi kynmaw, kala don ka kynhun GNLA kaba shu thok bad ngi la lap ia kane hadien, ynda la iohkem ia kiba donkti bad la shem ba kidei tang ki nongbylla” ong u Heh pulit.
