Shillong, Rymphang 24 : U Myntri ula pyntip ruh ba ka Sorkar kala pyndep ia ka jingthied ia ki jaka jong ki riew shimet bad dep ioh ruh ia ka jingbit na ki shipai bad pynheh ia ka Shillong Airport,ka ban plie lynti ia ka jingwan hiar ki liengsuin kiba heh.
Haba jubab ia ka cut motion ha Iingdorbar, u Bah Sniawbha ula pyntip ba ia mynta ka Umroi Airport ka dang dei ka kad kaba lah ban hiar tang ki liengsuin ATR-72 namar ba ka runway ka jrong tang 1829 meter.
“Ka Sorkar ka ryngkat ka jingiatreilang bad ka AAI, kila pynkhreh ia ka master plan….ban nang pynheh ia ka runway da 2400 meter, ka ban pynlah ia ka jinghiar ki liengsin ha runway 22 bad ban her na ka runwar 04.
Ka jingpynheh ka donkam sa 22 acre ka jaka-11.75 acre ka jaka ki riew shimet bad 10.3 acre jong ki shipai.
U Deputy Commissioner ka Ri-Bhoi, ula pyndep ia ka jingthied jaka jong ki riew shimet ha ka 28 tarik Kyllalyngkot 2026 ha ka jinglut ba T.72.17 klur kynthup ka jingsiew bailutksan bad ka jingaiti sha ka AAI kala nang iaid.
Ia ka jaka shipai, u Bah Sniawbha u iathuh ba ka Ministry of Defence kala ai ia ka Advance Working Permission ha ka 17 tarik Iaiong 2025 hadien ka jingiabujli jaka kaba shongdor katjuh. Ka Jylla kala ithuh ia ka jaka ba 7.7255 acre ha Shnong Umroi Madan, kaba ka jingmang antad ban thied ka long T.23.55 klur.
“Ka jingiasoi ia ka MoU kan sa long ha u bnai Lber 2026 bad ki shipai” ula bynrap.
