Shillong, Lber 6: U Myntri Rangbah ka jylla Conrad K Sangma ha ka sngi Palei ula pyntip ba ka sorkar jylla kala shna iaka Master Plan ha kaba iadei bad ka jingkhapngiah ha sor Shillong bad kumjuh ia ka jingiaid beit jong ki kali.
“Kane ka dei shi bynta jong ka Shillong Urban Mobility Policy,” ong u Conrad haba jubab ha ka kynta kylli jingkylla hapoh ka iingdorbar thawain.
Ula ong, ka jingshngain, ka jinglong jingman ki surok, ban thaw ia ki jaka ieng kali haduh ki jaka iaid kjat ki dei kiba la kynthup ha katei ka polisi treikam.
Ha kaba iadei bad ka jingkylli jong u Nongialam ka Liang Pyrshah Mukul Sangma halor ka jingdonkam ban pynlong ia ka jingwad bniah ia ka jingshngain jong ki surok, u Myntri Rangbah ula ong, “Ngin sa wad bniah ia kiei kiei baroh bad ngin pyrshang katba lah ban weng ia ki jingeh”.
Ula pynbna ba 30 percent jong ki surok kin dei ki bym iaid kali bad ula ong ba ka sorkar ka dang thaw ia ki jaka ban iaid ki paidbah.
“Baroh ki nongshong shnong kin kubur ba ka jingdheng kali ka dei kaba heh bad la shim ia ki sienjam ban pynduna iaka dheng kali” ong u Conrad haba pyntip ba palat 1200 tylli ki jaka pynieng kali kila don lane bei tyngka da ka sorkar.
Ula pynthikna “Baroh kiei kiei kid ei kiba la khmih bniah katkum ki kyndon ain”.
U Myntri Rangbah ula pyntip ba ka sorkar kala thaw ruh ia ka Street Parking Policy.
Hashwa kane, haba jubab ia ka jingkylli jong u MLA ka VPP na Mawlai, u Symbud Myntri Rangbah ba khmih ia ka tnad Transport Bah Sniawbhalang Dhar ula ong ba ka projek ban airong airup ha kylleng ki bynta jong ka surok ha Main Secretariat, ia kane la leh katkum ka Indian Road Congress (RIC):86-2018 – Geometric Design Standards for Urban Roads and Streets.
