Shillong, Naiwieng 25: Ka Directorate jong ka Higher & Technical Education jong ka tnad ka pule puthi ka jylla, hynne ka sngi, kala pyntip ba kala dep pyllait ia ka Post Matric Scholarship – 2023-24 sha ki 49,628 ngut ki samla pule ka jylla Meghalaya ha ki ar bynta bad mynta ka dang ap ban ioh ia ka pisa na ka sorkar pdeng ha ka wat kaba lai, ban pyllait iaka Scholarship kaba dang sahteng sha ki 27,127 ngut ki samla pule.
Katkum ka kyrwoh na ka Directorate of Higher & Technical Education, kala pyntip ba kala ioh pdiang T.1,08,83,36,926 ban pyllait ia ka Scholarships, kaba kynthup ia ka T. 98,08,91,952 na ka Ministry of Tribal Affairs jongka Sorkar India kum ka bhah na ka Sorkar Pdeng bad ka T.10,89,87,995 na ka Sorkar Meghalaya kum ka bhah na ka jylla.
Kala pyntip ba kila don 49,628 ngut kiba la ioh jingmyntoi bad la dep ban pyllait ia katei ka Scholarship.
Ha ka wat kaba nyngkong, la ioh pdiang ia ka pisa T.42,32,13,280 kaba kynthup ia ka bhah na ka sorkar pdeng kaba long T.38,08,91,952 bad ka bhah na ka sorkar jylla kaba long T. 4,23,21,328 bad la dep pyllait sha ki 17,364 ngut ki samla pule.
Ha ka wat ka baar, la ioh pdiang ia ka pisa kaba T.66,66,66,667 kaba kynthup ia ka bhah na ka sorkar pdeng kaba long T.60,00,00,000 bad ka bhah na ka sorkar jylla kaba T. 6,66,66,667 bad la dep ban pyllait sha ki 32,064 ngut ki samla kiba dei ban ioh jingmyntoi.
Ka scholarship kaba dang sahteng ka long na ka bynta ki 27,127 ngut ki nongioh jingmyntoi bad ia kane yn sa siew tang shu ioh ia ka pisa jong ka wat kaba lai na ka Ministry of Tribal Affairs jongka Sorkar India.
Kala pynpaw ba ka tnad kala shimkhia bha bad ka Sorkar India na ka bynta ban pyllait noh ia ka pisa ha ka wat ka balai bad ka pynthikna ia baroh ki samla pule ba kiba dei hok ban ioh ia ka scholarship ha ka por kaba biang.
Na ka bynta kino kino ki jingtip ne jingsngewkhia, lah ban phah da ka jingthoh sha ka [email protected].
