Shillong, Naitung 01: Ki don palat 407 ngut na ki 457 ngut ki nongdie jingdie madan kiba la ioh ia ka jingithuh kum ki nongdie jingdie madan ha ka thain Khyndailad, katkum ka ‘Survey’ kaba la leh da ka Provisional Town Vending Committee (PTVC).
Katkum ka kyrwoh na u Commissioner & Secretary uba khmih ia ka tnad Urban Affairs, la pyntip ba ka jingsam ia ki Certificates of Vending (CoV) kala sdang ha ka 2 tarik u Jylliew 2025 bad haduh mynta kila don 251 tylli ki CoV kiba la dep sam sha kitei ki nongdie madan kiba la ioh ia ka jingithuh.
Ka PTVC kala dep ban pynmih ia ka jingpynbna paidbah kaba la kyntu ia ki nongdie madan ki bym don ia ki CoV ba kidei ban pynthylli noh ia ki jaka ki jongki hapoh 3 sngi bad ka jingsdang ia ka jingpynkynriah ia kiba la don ia ka CoV kan sdang naduh ka 22 tarik u Naitung 2025.
Kala don ka jingpynbna paidbah naduh ka 25-28 tarik u Jylliew bad ban sdang ia ka kam ban pyllait noh ia ki jaka ki jongki nongdie madan kiba bym don ia ka CoV kan sdang naduh ka 30 tarik u Jylliew.
Ka Tnad kala khmih ruh ba ka jingbuh kyndon ia ki nongdie madan ka long ka kam kaba iar kaba donkam ia ka jingiatreilang na ka Shillong Municipal Board, ka ophis jong ka Deputy Commissioner bad ka tnad Pulit.
Ka jingsdang ia ka kam ha Khyndailad kadei tang ka jingsdang ia ka jingpyrshang ban pynkynriah ia baroh ki nongdie madan kiba la ioh ia ka jingithuh ban shong die jingdie noh ha ki jaka ban die jingdie.
Ka tnad kala pynmih ruh ia ka skhim kum ka Relocation Allowance kaba T.20,000 ia ki nongdie madan kiba don ia ka CoV kaba biang, ha kaba yn siew ia ka pisa kaba T.10,000 bad ia ka pisa kaba T.2,000 man la ka bnai haduh 5 bnai.
Kane ka rukom pyntreikam bad ka jingbuh ia ki kyndon ia ka rukom die jingdie madan kadei kaba la khmih da ka High Court, kaba long kongsan da ka Public Interest Litigation (PIL) kaba sngewkhia halor ki nongdie madan bad ka jingdheng kali, kala ong bad ka bynrap ba kane ka jingthmu ka long da ka jingthmu ban iada ia ka kamai jakpoh jong ki nongdie madan ha ryngkat bad ka kyntiew ia ka jinglong jingman kaba bit ba biang ia baroh.
Ka Provisional Town Vending Committee kala leh ia ka in-situ digital survey na ka bynta ki nongdie madan kiba la don lypa hapoh ki jaka jong ka Municipal katkum ki kyndon jong ka Scheme.
Ia kane ka Survey la leh ha ki wat bapher, kaba la sdang shwa kum ka jingpyrshang ha Khyndailad ha ka 4 tarik u Nohprah 2023 bad hadien kane la leh sa ha ki 22 tylli ki jaka bad la pyndep pat ha ka 16 tarik u Kyllalyngkot 2024.
Kila don baroh 1400 ngut ki nongdie madan kiba la dep ban survey ha kaba tang 760 ngut kidei kiba la shem ba kidei kiba la biang. Ka thain Khyndailad kadei kaba la shah jied ban leh ha ka wat kaba nyngkong jong ka jingpyntreikam, ha kaba ia ka kam jong ka jingkam (Claims) bad jingpyrshah (Objection) la dep ban shimkam.
La thaw ia ka Sub-committee ban pynlong ia ka Hearing, ia kaba la pynlong ha ka 28 tarik u Rymphang, 3 tarik bad 4 tarik Lber. La ioh pdiang 87 tylli ki jingkam ne ‘Claims’ ha kaba 62 kidei kiba la lah ban pynshisha bad 25 ngut ki nongdie madan kila pep ban wan.
La ai ruh ia ka lad na ka bynta kito kiba pep ha ka Hearing ha ka 25 tarik u Iaiong 2025 bad la pyndep ha ka 8 tarik u Jymmang 2025. Kane ka pyni ia ka jingshim ia ka sienjam na ka bynta ban pyntreikam ia ka Scheme bad ban pyrkhing ia ka jingdie dukan madan ha ki jaka Municipal.
.){kind=link}