Shillong, Lber 30 : U Myntri Rangbah ka Jylla Conrad K Sangma ha ka sngi Saitjain, ula pyntip ba ki Pulit kila dep ban ithuh ia katto katne ngut ki briew kiba donkti ha ka jingbom iap ia arngut ki nongbylla bar jylla ha Ichamati, East Khasi Hills.
“Katba ngi dang iakren, ki Pulit kila thwet ia kine ki briew. Kila dep ithuh ia katto katne ngut bad ki dang wad mynta ia ki. Ngin sa peit bad ngin sa pyntip sha phi hynrei kat kum ka ain, ngin sa jam beit shakhmat bad kat kiba donkti kin san gat ha ka jingbishar ka ain” ong u Conrad haba iakren bad ki nongthoh khubor.
Haba kylli, u Myntri Rangbah ula ong “ Ngam kwah ban jer kyrteng lane iathuh ia katno ngut ki don hynrei ngi la dep ban ithuh bad ngi la nang jam shakhmat ban kem ia ki”.
Ha ka sngi Balang, arngut ki bar jylla kila shah bomiap ha ka kynhun ki riew runar ha Ichamati. Kine ki arngut ki kyrten gu Esan Singh bad u Sujit Dutta. Kine ki dei kiba trei bylla ha ki par mawshun. Ia ki metiap jong ki la lap na Ichamati bad na Dalda.
Ki Pulit ki dang tohkit mynta ia ka jingkynnoh ba kane ka jingjia kala jia hadien ka rally pyrshah Citizenship (Amendment) Act kaba long ha ka thain.
Ha kajuh ka por, ka BJP kala pynrem ia kane ka jingjia bad kyntu ia u Myntri Rangbah ka Jylla ba un bthah ia ka Tnad Pulit ba kan pynthikna ba ki riew bymman ba donkti ban pyniap ia kine ki arngut ki dei ban shah kem bad shah tian bishar.
Haba iakren bad ki nongthoh khubor, u Nongaiktien ka BJP Bah M Kharkrang ula ong “Ka BJP ka pynrem ia kane ka jingjia ha Ichamati ha kaba arngut ki nongbylla sngi kila shah pyniap mynsngi mynshai. Bad ngi mynta ka sngi ngi la shim ia ka kabu ban aiti da ka dorkhas sha u Myntri Rangbah khnang ba un bthah ia ka Tnad Pulit ban pynthikna ba kine ki riew bymman kin shah kem kham kloi kat kaba lah, dei ban aiti ia ka chargesheet hapoh ka por ba dei bad ban pynsted ruh ia ka jingbishar khnang ba ki bahaiing hasem jong kine ki arngut kin ioh ia ka jingbishar kaba hok”.
