Shillong, Nohprah 14: U nongwad jingtip lyngba ka Right to Information (RTI) bah Disparsing Rani hynne ka sngi Balang u la pyntip ba ka tnat Ministry of Housing ka sorkar India kala pyllait haduh T. 245 klur sha Jylla Meghalaya ba kan pyntreikam iaki projek bapher bapher lyngba ka Shillong Smart City.
Haba kren sha ki lad pathai khubor u bah Disparsing u la iathuh ba ka sorkar Meghalaya kala pan haduh T. 638 klur naka sorkar India naka bynta ban pyntreikam iaki projek kibahap hapoh ka Shillong Smart City.
“Ki kot ki sla ba ioh naka tnat Urban Affairs ka sorkar jylla ka kdew ba ka sorkar India kala pyllait T. 245 klur ban pyn treikam iaki 11 tylli ki projek lyngba ka Shillong Smart city bad haduh mynta ka jingpyntrei ia kine ki projek kala iaid haduh 31.20 percent” iathuh u bah Disparsing.
U bah Disparsing u la iathuh ba ki 11 projek ba ka sorkar jylla kala ioh pisa ban pyntrei ki kynthup ka ka surok Smart Road Phase 1 ba 6 km, ka Mechanist Car Park ha Motohran, ka Waste Water Treatment ha Shillong, ka Rain Water Harvesting, ka Market ha Polo, Development of Tourist and Cum-Culture Centre, ka Laitumkhrah Market, ka Retrofitting Up-gradation of Parking Space, ka ICC ha Shillong, ka Traffic Awareness ha ki skul ha Shillong bad ka Fire Safety.
U la ong ba katkum ki kot ki sla la pynpaw ba ki kam bala pyntrei kila kot haduh haduh 31% hynrei napdeng kitei ki project tang ka jingoynbha ia ki jaka pynieng kali, ka jingtei ia ka Commercial Complex ha Polo ki dei kiba la paw kam hynrei kiwei kiwei kim pat paw dak satia.
